Ölkə futbolu
“Səbail” “müharibə” ərəfəsində
“Səbail”də qış yeyintisinə hazırlıq başlayıb. 2-c…
“Səbail”də qış yeyintisinə hazırlıq başlayıb. 2-ci dövrə bitən kimi bəzi futbolçuların heyətdən uzaqlaşdırılması, yenilərin transfer olunması planlaşdırılır.
Son oyundan sonra baş məşqçi Aftandil Hacıyev bunun ilk siqnallarını verdi. Onun mətbuat konfransında dediklərindən aydın olurdu ki, futbolçuların bəzilərindən razı deyil və dəyişiklik olacaq. Niyə və necə?
Hazırda Bayıl təmsilçisinin heyətində 9 legioner var və onların heç də hamısı əsas heyət oyunçusu deyil. Komanda 3-cü pillədə olsa da, sərgilədiyi oyun ümid vermir, xallarının xeylisini 2 texniki qələbə sayəsində əldə ediblər. Oyunçular arasında münasibətlər də yaxşı sayılmır, vahid ailə yaratmaq mümkün olmayıb. Müxtəlif qruplaşmalar mövcuddu, oyunlar zamanı onların elə meydanda mübahisə etməsini tez-tez görmüşük.
Xaotik vəziyyətə bir səbəb də klub idarəetməsindəki ikitirəlikdi. Klubun faktiki sahibləri bir dəstədi, AFFA-dan göndərilən və maliyyəyə nəzarət edənlər ayrı dəstə. Və onların da hər birinin öz oyunçuları var. Hamı daha çox qazanmağa, büdcədən daha çox oğurlamağa çalışır. Bu səbəbdən qışda bəzi oyunçuların göndərilməsi, qazanc gətirəcək digərlərinin gətirilməsi planlaşdırılır. Büdcənin kifayət qədər yaxşı olması onların “yemək” imkanlarını yaxşılaşdırıb, iştahlarını artırıb.
Enrike Perilyo, Tamazi Tsetsxaladze, Tome Kitanovski, Emil Martinov, Edqar Paçeko kimi oyunçuların getməsi gözlənilir. Onlara kompensasiya ödəniləcək və ya hansısa məbləğ qarşılığında müqavilələrinin pozulması razılaşdırılacaq. Əsl mərəkə də ondan sonra başlayacaq. Belə ki, rəhbərlikdə təmsil olunan 2 dəstənin hər biri özləri transferlərə əl qoymaq üçün mübarizəyə başlayacaq. Burada məqsəd komandanı gücləndirmək yox, imkan daxilində daha çox qazanmaqdı.
Hazırda ən çətin vəziyyətdə olan Aftandil Hacıyevdi. O, faktiki odla su arasında qalıb. Baş məşqçini kluba bir dəstə gətirib, transferlərə pulu digər dəstə ayırır. Və Hacıyev yayda olduğu kimi, istəyinə tam uyğun gəlməyən futbolçuların transferindən narahatdı. Faktiki ondan istifadə edir, bəzi şeylərə məcbur, bəzi futbolçuların oynadılmasını ondan israrla tələb edirlər. Belədə nə oyun qurmaq, nə də komanda formalaşdırmaq mümkün olur. Arzular və istəklərə görə qurulan heyət bir işə yaramır, komandanın oyun stilini yaratmaq olmur.
Texniki qələbələrə görə qazanılan xallar olmasaydı, komanda indi 6-cı pillədəydi. Və “Səbail”in real gücü də bundan artığına çatmazdı. Ötən tur autsayder “Zirə” ilə matçda sərgilənən futbol Bayıl klubunun əsl simasıdı. Zamanla geriləmə halında ayrılan böyük büdcənin hesabı istənəndə vəziyyət daha da gərginləşəcək və qışda klubda “vətəndaş müharibəsi” izlənsə, təəccüblənməyin. Hamı fürsət bilib, daha çox qazanmaq, klubda hakimiyyətin əsas təmsilçisi olmağa cəhd edəcək.
AĞA