Ölkə futbolu
Baş katibin vicdanına yazılan darmadağın
Elxan Məmmədovun 12 il əvvəl əkdiyi zəhər toxumlarının nətic…
Elxan Məmmədovun 12 il əvvəl əkdiyi zəhər toxumlarının nəticəsidi. Bu gün meyvələrini toplayıb, zəhərlənirik.
19 yaşadək futbolçulardan ibarət Azərbaycan millisi bu gün Avropa çempionatının seçmə mərhələsində ilk oyununu keçirdi. Və təbii ki, darmadağın oldu. Tiflis şəhərindəki Mixail Mesxi adına stadionun ikinci meydanında baş tutan oyunda millimiz İsrail qarşısında biabır oldu – 1:4.
Gürcüstanda keçirilən qrupun növbəti oyunları haqda da proqnozumuz bəddi. Yəqin ki, meydan sahiblərinə məğlub olacağıq, Lixtenşteyni yenməyimiz də sual altındadı. Beləliklə, U-17-dən sonra daha bir yığmamız üçün qitə yarışları başlamadan bitəcək.
Baş məşqçi Vüqar Məmmədi və ya yetirmələrini qınamayın. Olanımız budur və bu futbolçular ən yaxşılarımızdı. Sabahımızı onlara əmanət etmişik. Daha yaxşılar yoxdusa, bunun günahı Vüqar Məmməddə deyil, birbaşa AFFA-da, onun strateqi baş katib Elxan Məmmədovdadı. 12 ildi büdcəni talayan, mənasız layihələrə xərcləyən, yalnız öz dost-tanışlarına, qohum-əqrabasına şərait yaradan katib futbolumuzun sabahı üçün heç nə etməyib. Nə futbolçu, nə mütəxəssis yetişdirilib.
Məmmədov futbol hakimiyyətinə gəldiyi gün işi düzgün qursaydı, həmin vaxt 5-6 yaşı olan uşaqlar indi U-19-un əsas simaları olmalıydı. Amma səriştəsiz katibin futbol savadsızlığı üzündən heç bir iş görülməyib, milli komandalarda rəqabətin olmaması bir yana, hətta lazımi sayda keyfiyyətli futbolçu da tapa bilmirik. Bu səbəbdən indiki futbolçu və məşqçi heyətini yox, strategiyanı yanlış quran rəhbərləri qınamalıyıq.
Ümumiyyətlə, heç bir faydalı iş görmədən 12 il vəzifə başında olmaq özü müəmmalıdı. Büdcəni dağıtmaq qəhrəmanlıqdısa, o zaman Məmmədov daha yüksək postlara layiqdi, bu bacarığını artıqlaması ilə sübut edib. Yox, inkişaf istəyiriksə, yenə Məmmədov erası bitməlidi. Hər iki halda onun futbol təsərrüfatındakı missiyası sonlanmalıdı.
Həmişə söhbət uşaq futbolunun durumundan düşəndə baş katib başqalarını nişan verir. O, yeni nəslin yetişməsinə klubların cavabdeh olduğuna işarə vurur. Hardasa haqlıdı, amma…
…Artıq bütün ölkə klubları da sizin əlinizdədi, siz maliyyələşdirir, siz idarə edirsiz. Hanı nəticə?
…Uşaqları klublar yetişdirməlidisə, illik 3-4 milyon manatı niyə bu adla siz dağıdırsız, qondarma yarışlara külli miqdarda vəsait sərf edirsiz?
…Və nəhayət, ölkədə futbolun inkişafına birbaşa cavabdeh olan AFFA niyə klubları buna məcbur edəcək konsepsiya hazırlamayıb, strategiya qurmayıb?
Ey, Elxan Məmmədov, bəhanə fikirləşmə. Sənə sərf etməyəndə özünü yalnız icraçı kimi tanıdırsan, amma unutma ki, İcraiyyə Komitəsinin qərarı ilə ölkə futbolunun birbaşa idarəsi sənə tapşırılıb, zəhmət olmasa, cavab ver. Ya iş gör, bugünkü darmadağına görə hesabat ver, səhvlərini etiraf et, üzr istə, ya da çıx get, qoy, işi bacaranlar görsün. Sənin özbaşnalığına dözmək üçün daha bir neçə ilimiz yoxdu. Bugünkü 1:4 məhz sənin vicdanına yazılan darmadağındı.
FƏRİD
- Müsahibə2024-04-18 08:00
Rezabala avrokuboka vəsiqə istəyir: “Səhv etməyə ixtiyarımız yoxdur”
- Digər idman növləri2024-04-17 21:46
“Neftçi” finalda “Xəzri”yə rəqib oldu
- Digər idman növləri2024-04-18 17:00
Şahmat Federasiyası yeni loqonun hazırlanması ilə bağlı müsabiqə elan etdi
- Ölkə futbolu2024-04-19 08:00
Juninyoya Niderlanddan da müştəri çıxdı