Ölkə futbolu
İşi bacaranlara tapşırmaq zərurəti
Topaz Premyer Liqasında 8 komanda mübarizə aparır və onların…
Topaz Premyer Liqasında 8 komanda mübarizə aparır və onların 7-ni yerli baş məşqçi çalışdırır. Adlara diqqət edək:
“Neftçi” – Roberto Bordin, 53 yaş
“Sabah” – Elşad Əhmədov, 48 yaş
“Keşlə” – Tərlan Əhmədov, 47 yaş
“Qarabağ” – Qurban Qurbanov, 46 yaş
“Zirə” – Samir Abbasov, 40 yaş
“Qəbələ” – Sənan Qurbanov, 38 yaş
“Səbail” – Aftandil Hacıyev, 37 yaş
“Sumqayıt” – Ayxan Abbasov, 37 yaş
Ayxan Abbasovun Nazim Süleymanovu əvəz etməsindən sonra orta yaş həddi 43-ə endi və o, Aftandil Hacıyevlə birgə ən gənc çalışdırıcılardı. Siyahıdakı son 5 nəfəri – Sənan Qurbanov istisna olmaqla -, elə 4-cünün tələbələri də saymaq olar. Və onlardan ikisi şura komandalarında çalışır.
Tam yeni məşqçilər nəslidi və həqiqətən də yalnız futbolu, meydanı düşünənlərdi. Samirin “Sumqayıt”ı kiçik büdcə ilə ötən mövsüm hamıya meydan oxuyurdu, bu il də “Zirə” ən yaxşı futbol oynayan komandalardan biridi; Aftandil debüt ilində ilk “üçlük”dədi; Ayxan “Zirə”də işi ilə elə yadda qalıb ki, ikicə ay bekar oldu və bu gün təyinat aldı.
Elşad Əhmədovla Tərlan Əhmədov “Neftçi”nin Sadıq Sadıqovlu vaxtlarında “bişən” məşqçilərdi, Sənan Qurbanov “Qəbələ” ailəsində təcrübə keçib, Roberto Bordin isə əcnəbidi. Bəs, AFFA-dakı işbazların kadrları hanı, onlar kimi ortaya çıxarıb? Daydaylı Vəli Qasımov, Elxan Abdullayev, Təbriz Həsənov, Yaşar Vahabzadə, Babək Alxasov və başqaları, havayı pul qazanan Bernard Lippert hardadı?
Artıq hamı anlayıb ki, tapşırıqla işləyən məşqçilərdən fayda yoxdu, savadlı, daim üzərində işləyən gənclərə güvənmək lazımdı. Və bunu baş katib Elxan Məmmədov da dərk edir, Abbasovun “Sumqayıt”a təyinatına ürəkdən yox, məcburiyyətdən razılıq verir. Dostlarını, tanışlarını rəhbər vəzifələrdə oturdub, qara işi Qurbanovun əməksevər tələbələrinə tapşırıblar. Millilərdə belədi, yavaş-yavaş klublarda da bu xətt inkişaf edir.
Amma məşqçi təyinatları ilə ölkə futbolunun xilası mümkünsüzdü. Bu tendensiyanı daha da irəli aparmaq lazımdı. Klublara, AFFA-da mühüm postlara Məmmədov və dostları deyil, işi bacaranlar – Tahir Süleymanov, Yaşar Seyidov, Yaşar Sultanov, Rəşad Qasımov kimi futbolla nəfəs alanlar təyinat almalıdı. “Qəbələ”, “Zirə”, “Qarabağ” kimi klublarda illərdi özünü sübut edən, ən yaxşı nəticələrə imza atan rəhbərlər AFFA-da müxtəlif postlara gətirilməlidi. Eləcə də Rəşad Sadıqov gələcəkdə məşqçi deyil, uşaq futbolunu, milliləri yönətəcək rəsmi şəxs kimi səhnəyə çıxmalıdı. Yalnız o zaman inkişafdan, perspektivdən danışa biləcəyik.
AĞA
- Müsahibə2024-04-18 08:00
Rezabala avrokuboka vəsiqə istəyir: “Səhv etməyə ixtiyarımız yoxdur”
- Digər idman növləri2024-04-17 21:46
“Neftçi” finalda “Xəzri”yə rəqib oldu
- Digər idman növləri2024-04-18 17:00
Şahmat Federasiyası yeni loqonun hazırlanması ilə bağlı müsabiqə elan etdi
- Ölkə futbolu2024-04-18 09:45
Mirzov “Neftçi” ilə yeni müqavilə imzalamayacaq