“Mən “İnter”də oynayarkən belə halla rastlaşmışdım”

“Qəbələ”nin yarımmüdafiəçisi Asif Məmmədovun futbolinfo.az saytına müsahibəsi:

– “Qəbələ” son turda “Qarabağ”a qalib gəldiyi oyunu uduzdu. Həmin oyunu necə şərh edərdin?
– “Qarabağ”la matça yaxşı başlasaq da, 2-ci hissədə erkən qol buraxdıq. Fikrimcə, bu qol komandaya çox pis təsir etdi. Elə hər şey də ordan başladı. Həmin qoldan sonra sanki komanda yavaş-yavaş öz oyununu tamamilə itirdi. 

– Qeyri-sabit çıxışı nə ilə əlaqləndirərsən?
– Təzə heyət, təzə baş məşqçi var. Bizim bir az vaxta ehtiyacımız olduğu görünür. Amma son oyunlarda hardasa özümüzə gəlmişik. Qarşıdakı matçları fikirləşmək, qalib gəlmək lazımdı. Layiq olduğumuz pilləyə qalxacağımıza çox inanıram. 

– İlk pillə ilə aranızda 14 xal fərq var. Heç olmasa ilk “3-lüy”ə düşəcəyinizə inanırsan?
– Mən “İnter”də oynayan vaxt belə halla qarşılaşmışam. Həmin vaxt da hamı deyirdi ki, komanda liqada qalmaq uğrunda mübarizə aparacaq. Amma səhv etmirəmsə, həmin il yuxarı pillələrə qalxdıq. “Qarabağ”la aramızda 2 xal fərqi oldu. Onlar çempion oldu, biz isə gümüş medallara sahib çıxdıq. Halbuki çempionatın startında 7 oyuna 2 xalımız var idi. 

– Komandada ab-hava problemi yoxdu? Uzun illərdi ordasan və hər şeyi görürsən…
– Hər şey əvvəlki kimidi. Ab-hava necə idisə, indi də elədi. Yenə deyirəm ki, yavaş-yavaş komanda düzəlir. Əsas odu ki, ruhdan düşməmişik. Əminəm ki, bu heyətlə irəli gedəcəyik. 

– Fasilədən necə yararlandız?
– Bəzi futbolçularımız müxtəlif milli komandalarda idilər. Amma yenə də yaxşı hazırlıq keçdik. Fasilədən istifadə edib hazırlaşdıq. 

– Son 4 oyunda cəmi 45-50 dəqiqə meydanda olmusan. Bunu nə ilə əlaqələndirirsən?
– Heç bir problem yoxdu. Yəni zədəli deyiləm. Sadəcə, bu, baş məşqçinin qərarıdı. Nə zaman şans versə, meydana çıxmağa hazıram.

CAVAD