Ölkə futbolu
Kamran Ağayev Kosovoya niyə getməyib?
Kosovo – Azərbaycan matçının nəticəsinin (0:4) müzaki…
Kosovo – Azərbaycan matçının nəticəsinin (0:4) müzakirə olunduğu bir vaxtda başqa iddialar da gündəmdədi. Mətbuatda bəzi oyunuçların bilərəkdən zəif oynaması, baş məşqçi Qurban Qurbanovun istefasına nail olmaq üçün darmadağına çalışılması haqda söz-söhbətlər gəzir.
Futbolinfo.az xəbər verir ki, Dmitri Nazarov, Pavel Paşayev və Rüfət Dadaşovun zəif oyununu onların Riad Rəfiyevin müştəriləri olması ilə bağlayırlar. Əvvəllər milli komandanın meneceri olan, indi “Sumqayıt”ın prezidenti kimi çalışan şəxs sözügedən futbolçuların millimizə gəlişində rol oynayıb. Deyilənlərə inansaq, indinin özündə də milli komandadan aldıqları mükafatın, eləcə də transferləri zamanı əldə etdikləri pulun bir qismi məhz Rəfiyevə çatır. O da bu futbolçuların milliyə çağırılması, oynadılması üçün bütün imkanlardan yararlanır.
Riad bəyin hamisi AFFA-nın baş katibi Elxan Məmmədov olduğundan məsələ başqa səmtə yönəlir. Amma bunlar yalnız söz-söhbətdi, əldə ciddi fakt yoxdu.
Bu məsələdə adı hallanan digər futbolçu Kamran Ağayevdi. “Keşlə”nin qolkiperi Farer adaları ilə Bakıdakı matçda zədələndiyi üçün əvəzlənmiş, sonra ümumiyyətlə, heyətdən çıxarılmışdı. Deyilənlərə inansaq, Kamran Kosovo ilə vacib sınağa bilərəkdən getməyib. Və buna 2 səbəb göstərilir.
Guya ki, MRT müayinəsindən sonra Ağayevdə ciddi problem aşkarlanmayıb. Düzdü, onun ayağında əzilmə var, lakin bu, oynamağına mane olmamalıymış. Milli məşqçiləri də israrla onun düşərgədə qalmasını, matça kimi müalicə edilməsini təklif edib. Hətta Kamrana heyətdə olmasa da, Priştinaya turist kimi yollanmaq, kapitan olduğu üçün komanda yoldaşları ilə bir arada olmaq tövsiyə edilib. Kamran bundan boyun qaçırıb və Bakıda müalicəsini davam etdirib, çempionat matçına kimi sağalmaq istədiyini bildirib.
“Keşlə” ilə əlaqə saxlayıb, futbolçunun vəziyyəti ilə maraqlandıq. Mətbuat ximətindən Ağayevin həqiqətən zədəli olduğu və bu üzdən son məşqləri buraxdığı deyildi. Məşqçilər heyəti də “Qəbələ” ilə oyuna Davud Kərimini hazırlaşdırır, “çərçivə” böyük ehtimalla ona tapşırılacaq.
“Keşlə”dən aldığımız xəbərə inanmaq istəyirik və Kamranın durumuna qarşıdakı tur bir daha aydınlıq gətirəcək. Lakin Ağayevin hətta turist kimi Kosovoya getmək istəməməsinin başqa bir səbəbi də var. Yenə şaiyələrə inansaq, o, bəzi futbolçuların biərəkdən zəif oynayacağından xəbərdar imiş və bu kampaniyadan kənar qalmaq üçün belə edib.
Şaiyələrə yox, reallıqlara inanmaq istəyirik. Ağayev zədəlidi və “Qəbələ”yə qarşı da oynamayacağı gözlənilir. Qalan məsələlərə adı çəkilənlər, bir də zaman aydınlıq gətirməlidi, gətirəcək də…
FƏRİD