Ölkə futbolu
Zaur Axundov baş katib üçün bahalı restoranda qonaqlıq verdi
«Keşlə»nin Müşahidə Şurasının sədri Zaur Axun…
«Keşlə»nin Müşahidə Şurasının sədri Zaur Axundovun, deyəsən, son vaxtlar işləri əla gedir.
Təbii ki, bunun klubla əlaqəsi yoxdu. Axı komanda ölkə kubokunda mübarizəni ¼ final mərhələsində dayandırmaqla yanaşı, Premyer Liqada da hədəfindən çox uzaqdı.
Görünür, hörmətli Zaur bəyi bu gedişat bir o qədər narahat etmir və ürəyinin dərinliyində vəziyyətin düzələcəyinə inanır.
Bəlkə də başqa məqsədləri, planları var. Bizim bununla işimiz yoxdu. Hər halda Axundovun AFFA ilə işi var. Aldığımız yeni xəbər də «Keşlə»nin sahibinin Elxan Məmmədovla münasibətlərinə dairdi.
Belə ki, AFFA-nın baş katibi bugünlərdə Bakının ən bərkgedən istirahət məkanlarından birində, konkretləşdirsək, «Bakı» restoranında olub.
Ailə üzvləri və bir neçə yaxın dostu ilə bərabər. Axundov burda da hamıdan qabaq əlini cibinə salıb və qonaqlığın xərcini qarşılayıb.
MŞ sədrinin nə münasibətlə baş katibə jest etməsini deyə bilmərik. Sadəcə, gücümüz gümana çatır.
Məsələn, mümkündü ki, o, Elxan Məmmədovla münasibətlərinin korlanması barədə mətbuatda gedən xəbərlərə əks olaraq belə bir addım atsın.
Belə də ki, varlığa nə darlıq?
Ümumiyyətlə, yaxın çevrəsi iddia edir ki, Axundov heç də kənardan göründüyü kimi sərt biri deyil. bəzən güzəştə getməyi də bacarır.
Nə deyirik, Allah onları daha da mehriban eləsin! (Sportinfo)