Ölkə futbolu
Kamranın reklam qazancı “Keşlə”nin taleyindən önəmlidi?
Sən demə, yayda çox sərfəli reklam müqaviləsi bağlay…
Sən demə, yayda çox sərfəli reklam müqaviləsi bağlayıb, indi də şərtləri yerinə yetirmək üçün klubun taleyi ilə oynayır. Maaş aldığı, çörək qazandığı, kapitanı olduğu, nəticələrinə görə məsuliyyət daşıdığı “Keşlə”nin planları vecinə də deyil, əsas olan “Coca Cola”dan aldığı qonorardı.
"Keşlə"nin futbolçusu Kamran Ağayevin Antalyadakı təlim-məşq toplanışını yarımçıq tərk edib, Azərbaycana gəldiyini xəbər vermişdik. Toplanışın son günü, komandasının sınaq matçına qalmadan evə dönən qolkiperin bu addımının səbəbini futbolinfo.az öyrənib.
Belə ki, Ağayev "Coca-Cola" şirkətinin Novruz bayramı üçün çəkilən reklamında yer alacaq. Bu səbəbdən o, vətənə tez dönüb. Gəlib çəkilişlərdə iştirak edib və komandanın yolunu burada gözləyib.
Futbolçuların reklama çəkilməsi, simalarından istifadə edilməsi çox yaxşıdı. Bu sahənin inkişaf etdirilməsinə ehtiyac var və bütün dünyada bu praktikadan istifadə edilir. Əksər futbolçular reklam gəlirlərindən məxsus olduqları klublara müəyyən faiz də ödəyir və ya müqavilələrində reklam gəlirlərinin müəyyən hissəsinin kluba məxsus olması barədə bənd nəzərdə tutulur. “Keşlə”də belə olub-olmadığını bilmirik, amma Kamran özü bu şirkətdən çox böyük məbləğdə qonorar alıb.
Yayda bağlanan müqavilədə konkret günlər göstərilib. Belə ki, həmin günlərdə Ağayev mütləq bu şirkətin sərəncamında olmalıdı. Anlaşmada çempionat oyunlarının, millinin matçlarının nəzərə alınıb-alınmadığı, üst-üstə düşəcəyi təqdirdə nə qərar verildiyini bilmirik. Amma millinin son matçı yada düşəndə adam hər şeydən şübhələnir.
Ötən il, noyabrın 20-də millimiz Kosovo ilə səfər matçına gedərkən Kamran Ağayev komandadan ayrılmışdı. Onun 3 gün öncəki Farer adaları matçında zədələndiyi üçün düşərgədə olmadığı deyildi. Qapıçının zədələnməsi mümkün idi və burada qaranlıq məqam yoxdu. Ancaq iş ondadı ki, Kamran hətta turist kimi getməyi, kapitan olaraq komandanı tək qoymamağı da lazım bilmədi, Bakıda qaldı. Bəlkə elə o zaman da bütün bunlar reklam anlaşmasına görə imiş. Bəlkə…
“Keşlə”dən son ayrılığa gəlincə, Kamran rəhbərlikdən icazə alıb və səbəbi də açıq deyib. Klub başbilənləri də onun sözünü yerə salmayıb. Əslində isə bunu etməməliydilər. Çünki həmin vaxt komandanın düşərgəsində cəmi bir əlcək sahibi qalmışdı. Davud Kərimi qolundan əməliyyat olunub Antalyaya getməmişdi, Ağayev də məlumdu. Və komanda son sınaq matçında yalnız Şahin Zəkiyevə möhtac qalmışdı. O da oyunun gedişində hər hansı xəsarət alsaydı, yəqin ki, qapıda ya baş məşqçi Tərlan Əhmədov, ya da klubun rəhbəri Zaur Axundov dayanmalı olacaqdı.
Təbii ki, bu, bir zarafatdı, lakin reallıq da var. Peşəkar klubdan danışırıqsa, “Keşlə” bunu özünə rəva görməməliydi. Görünür, Premyer Liqanın səviyyəsi o qədər aşağı düşüb ki, işə həvəskarcasına yanaşılır. Bəlkə də komandanın 10-11 legionerlə autsayderlər qrupunda qərarlaşmasının səbəbi elə budur.
FƏRİD