Əmisi, xətrinə dəymə Tamerlanın

Tamerlan! Əmir Teymuru avropalılar belə adlandırırdılar.

Tamerlan – Əmir Teymur bacarığı, sərkərdəlik qabiliyyəti, iti ağlı, düşüncəsi hesabına az qala dünyanın yarısına hökmranlıq etməyi bacarmışdı.

Ta o vaxtdan, valideynlər övladlarına Tamerlan adı veriblər. Amma Tamerlan adı verilən hər uşaq böyüyüb də Əmir Teymur ola bilməzdi axı.

Amma istəyin qarşısını almaq da mümkünsüz. Arzu, istək ki var, “qanadsız quş kimidir” deyirlər. Sənə kim mane olur ki,  böyük-böyük arzular, istəklər formalaşdırmağa?

Məsələn, əmin öz oğluna yepyekə bir oyuncaq – futbol klubu bağışlayır. Əmin oğlu o klubla oynayır-oynayır, gözünün qurdunu öldürür və sənə bağışlayır. 

Sən də bu yepyekə oyuncağı alandan sonra yepyekə arzular qurusan. Məsələn, istəyirsən ki, sənin klubun “Real”, “Çelsi” boyda, gücdə olsun.

Bunun üçün də nə edirsən? Gedirsən, “Real”da, “Çelsi”də oynamış, hazırda təqaüddə olan bir veteran futbolçunu gətirib buraxırsan meydana. Və elə bilirsən ki, “Real”da, “Çelsi”də oynamış bu futbolçu “Səbail”də də forma geyinərsə… “Səbail” dönüb olacaq “Real”, “Çelsi”.

Uşaqdır də, belə bilir. Uşaq arzusunun sərhədi olmaz ey. İndi durub bu uşağı  bu arzusuna görə ittiham edəsi deyilik ki.

Yox, qətiyyən. Hələ bir, əmisinə demək lazımdır ki, uşağın qəlbini qırmasın, pulun-parasın artırsın ki, arzuları, istəkləri də bir qədər böyüsün. Arzuları, istəkləri böyüyə-böyüyə, bəlkə özü də böyüdü, inşallah. Böyüyüb vətənə, xalqa gərəkli bir oğul oldu. Baxmayaraq ki, indi bahalı oyuncağını – “Səabil”i “Real”, “Çelsi” etmək istəyi üçün xərclədiyi vəsait də əmisinin deyil, elə vətənin, xalqındır.

Amma belə bir əmin varsa, başına daş sala bilərsən vətənin, xalqın vəsaitinin. Buna görə xətrinə dəyməyəcəklər ki, Tamerlanın.

Bilmək olmaz, bəlkə böyüyüb elə Tamerlan – Əmir Teymur olacaq bu balaca Tamerlan. “Səabil” də “Real”, “Çelsi”…

Əmisi, xətrinə dəymə Tamerlanın. Pul vətənin, xalqındır. Onun başına daş da salmaq olar, havaya da sovurmaq.

Uşağın böyük-böyük  arzuları naminə. Arzularında şirinlik duy, bala.