“7-ci yerdə olsaydıq da, eyni sözü deyərdim” – Boyoviç

“Keşlə”nin müdafiəçisi Miyuşko Boyoviçin futbolinfo.az-a müsahibəsi

– “Keşlə” ilə yeni müqavilə imzaladın…
– Birincisi, “Keşlə”yə təşəkkür edirəm. Çünki onlar mənə inanırlar və düşünürlər ki, mən komandanın növbəti proyektlərində vacib hissələrdən biriyəm. Mən həmişə əlimdən gələnin ən yaxşısını etməyə çalışacam və bacarıqlarımla “Keşlə”nin uğurunda pay sahibi olmaq üçün oynayacam. Həmçinin ailəm Bakıda xoşbəxtdir və bizim üçün hər şey qaydasındadır.

– Geridə qalan 1 ili özün üçün necə dəyərləndirirsən?
– Son mövsüm çox yaxşı alındı. Şəxsi olaraq mənim üçün uğurlu il oldu. Bizim yaxşı oyunçularımız var və birlikdə hədəfə doğru irəlilədik. Artıq Avropa Liqasının təsnifat mərhələsində mübarizə aparacağıq. Bunun üçün əlimizdən gələni etməyə hazırıq.

– Hər halda Premyer Liqanı tam uğurlu saymaq olmaz. Çünki mövsüm yarımçıq dayandırıldı…
– Mənim fikrimcə, mövsümün dayandırılması yaxşı qərar idi. Bunu əvvəl də demişdim. Yalnız bir düzgün qərar var idi ki, mövsüm ləğv edilsin. Əgər mənim komandam turnir cədvəlində 7-ci pillədə də olsaydı, yenə eyni sözü deyərdim.

– Yeri gəlmişkən, Avropa Liqasında təsnifat mərhələsi 1 oyundan ibarət olacaq. Bu oyunlarınıza təsir edəcək?
– Əgər iyulun 6-da məşqlərə start versək, hazırlığımız üçün 6 həftə olacaq. Bu müddət Avropa Liqasına hazırlaşmağa kifayət edər. Təsnifat mərhələlərinin bir oyundan ibarət olması çətinlik yaradacaq. Çünki başlanğıcda hansısa komanda top formasında olmaya bilər və bu oyuna təsir edər. Lakin oyunçuların sağlamlığı bu gün daha önəmlidir və hazırlaşmaq daha vacibdir.

– Oyun təcrübəsi baxımından əziyyət çəkəcəksiniz…
– Biz hər vəziyyətə hazır olmalıyıq. Baş məşqçi və məşqçilər heyətinin hər vəziyyət üçün planları mövcuddur. Lakin yoldaşlıq matçlarının rəsmi oyunlara o qədər də təsiri olduğunu düşünmürəm. Rəsmi matçlar həmişə çətin keçir. Xüsusilə ilk oyunlar ağır olur.

– Slavik Alxasov komandadan ayrıldı. Necə düşünürsən, onun yeri görünəcək?
– Sözsüz ki, sizin dediyiniz doğrudur və onun yeri görünəcək. Dünən onunla danışdıq və Slavik haqqında fikirlərimi özünə də dedim. Onun üçün kapitan və oyunçu kimi darıxacağıq.

FƏRİD