Ölkə futbolu
Stuxlik “Neftçi” üzərində təcrübə aparır
AFFA Hakimlər və Hakim-İnspektorlar Komitəsi eksperimentlərə dav…
AFFA Hakimlər və Hakim-İnspektorlar Komitəsi eksperimentlərə davam edir. İkisi FIFA referisi olmaqla, 4 hakimi mövsümün sonuna kimi cəzalandıran qurum yarışın sonunda qəribə təyinatlarla gündəmə gəlir.
Çempionluq mübarizəsinin, avrokuboklara vəsiqə uğrunda yarışın ən həlledici anında komitə bir neçə gənc hakimlə mövsümü yola verməyə çalışır. Vəziyyət o qədər dramatikdi ki, bir hakim hansısa komandanın ardıcıl oyunlarına təyinat alır.
Məsələn, bu ildən Premyer Liqada debüt edən Səbuhi Bayramov 4 gün ərzində “Zirə”nin 3 oyununda olacaq. Bu gün ölkə kubokunun "Sumqayıt" – "Zirə" görüşündə baş hakim olacaq Bayramov, ayın 26-da “Zirə-2”nin “Şüvəlan”la görüşündə ehtiyat hakim kimi fəaliyyət göstərəcək. O, ertəsi gün "Zirə"nin bu dəfə Premyer Liqa çərçivəsində "Qarabağ"la oyununu idarə edəcək.
Komitə sədri Frits Stuxlik “Neftçi”ni də təcrübə dovşanına çevirib. Ötən tur Rövşən Rəcəbov elitada baş hakim kimi cari mövsümdə debütünü bu komandanın “Sabah”la oyununda etmişdi. İndi isə bakılıların “Sumqayıt”la ev matçında Kamal Umudlu siftə edəcək. Gənc referinin bir səhvinin “Neftçi”ni qızıl medallardan edə biləcəyini nəzərə alsaq, belə təyinatların riskli olduğunu yazmalıyıq.