Layihə
Maliyyə hesabatı: "Qarabağ" və "Neftçi"nin birgə büdcəsi digər 6 klubun cəmindən çoxdu
Klubların maliyyəsi haqqında onillərdi gizli saxlanılan, he&ccedi…
Klubların maliyyəsi haqqında onillərdi gizli saxlanılan, heç vaxt dəqiq bir şey öyrənə bilmədiyimiz bilgilər gün üzünə çıxır. Kimin nə qədər qazandığı, nə qədər xərclədiyi hamı üçün sirr olardı. Nəhayət, UEFA-nın lisenziya tələbindən sonra klublar bəzi məlumatları bölüşməyə məcbur oldu.
Bunu “qismən şəffaflıq” saya bilərik. Çünki açıqlanan siyahılar tam inandırıcı deyil, bir çox rəqəmlər reallıqla üst-üstə düşmür. Bir çox xərclər var ki, hansısa bölmədə gizlədilib, ümumiləşdirilib. Lakin əsas odur ki, istinad edəcəyimiz mənbə var.
Rəqəmlərə inansaq, klubların büdcələri bu şəkildə sıralanır (milyon manatla):
Qarabağ – 15,218
Neftçi – 11,205
Qəbələ – 7,748
Keşlə – 5,271
Səbail – 3,821
Zirə – 3,398
Sabah – 1,864
Sumqayıt – 1,527
Komandaların Premyer Liqanın bu gün yekunlaşacaq növbəti mövsümündəki tutduqları yerə baxmaq da da fayda var. “Qarabağ” və “Neftçi” büdcəsinə uyğun mövqedə qərarlaşıbsa, “Qəbələ” bir pillə geridədi. “Qırmızı-qaralar”ın ölkə kubokunda final oynayacaqlarını nəzərə alsaq, “günah”ı bağışlanandı.
Digər komandalar da büdcəyə uyğun yer tutub. Amma “Sumqayıt”da vəziyyət fərqlidi. Gəliri 1,527 milyon manat olan klub 2,676 milyon xərcləyib, büdcə1,149 milyon manat aşılıb. Bu pulun haradan təmin edildiyi barədə məlumat yoxdu.
“Keşlə” isə futbolumuzun anormallığıdı. Klubun rəhbəri Zaur Axundovun maliyyə idarəçiliyinin niyə tez-tez yoxlandığını indi başa düşürük. Bu şəxsə 5,271 milyon manat da bəs etməyib və büdcədən əlavə 468 min manat xərcləyib. Ziyanla işləyən komandanın çempionatda sonuncu pilləni tutması və diviziona yuvarlanacağı reallıqdı. 5,7 milyon manatla sonuncu olmağı yalnız “Keşlə” bacarardı. Klub büdcəsinə görə 4-cü olsa da, uğursuzluq yaşayıb, deməli, AFFA-dan/SOCAR-dan ayrılan pullar dağıdılıb, havaya sovrulub.
Ümumiyyətlə, klublarımızın cəmi büdcəsi 50,052 milyon manat təşkil edir. Bu da orta hesabla hər kluba 6,256 milyon deməkdi. Bu həddi cəmi 3 klub keçib və onlarda ikisi – “Qarabağ”la “Neftçi” avrokuboka vəsiqə əldə edib, “Qəbələ” isə buna yaxındı. Maraqlıdı ki, ağdamlılarla bakılıların ümumi büdcəsi digər 6 komandanın ümumi büdcəsindən çoxdu.
(davamı olacaq)