Dünya futbolu
“Keşlə”dən daha biri getdi – Axundovla davaya görə
“Keşlə” daha bir futbolçu ilə yollarını ayır?…
“Keşlə” daha bir futbolçu ilə yollarını ayırır. Gedən legioner limitində yer tutan azərbaycanlıdı.
Mövsüm bitən kimi 13 oyunçunu yola salan, daha sonra Sərtan Taşkınla vidalaşan bakılılar sonuncu pilləni “təmin edən” əksər oyunçulardan canını qurtarır. Bu dəfə də Samir Məsimovdan imtina edilib. Rusiya vətəndaşı kimi oynayan həmyerlimizin gediş səbəbi başqadı.
Ötən yay komandaya götürülən Samir ümidləri doğrultmadı. Lakin o, rəhbərlik və məşqçilərlə yola getmədiyi üçün bu aqibəti yaşadı. Başı klubdaxili qalmaqallara qarışan yarımmüdafiəçi öz formasına da diqqət etmədi. Belədə vida qaçılmaz idi.
Amma Samirin mövsüm bitən kimi yox, məhz indi yola salınmasının başqa səbəbi var. Belə ki, onun klubla daha bir illik müqaviləsi var idi. Son ana kimi tərəflər gözlədi və sonda müqaviləyə qarşılıqlı razılıqla xitam verdilər.
Düzdü, hələlik “Keşlə” rəsmi açıqlama verməyib, lakin Məsimov yeni komanda axtarışındadı. Onun Rusiyanın aşağı dəstə komandalarından biriylə razılığa gəldiyi deyilir.
Samirin klubdan ayrılmasına səbəb olan əsas hadisə Sumqayıtda baş verib. Aprelin 6-da, 23-cü tur çərçivəsindəki matçdan sonra “Keşlə”nin Müşahidə Şurasının sədri Zaur Axundova cavab qaytaran futbolçunun taleyi həll olunub. Yerli komandaya 1:2 hesabıyla məğlubiyyətdən sonra Axundov, adətinə uyğun olaraq, paltardəyişmə otağına girib və futbolçuları təhqir edib. Komandasının yeganə qolunu vuran Məsimov isə dözməyərək Zaur bəyə cavab qaytarıb.
Bu hadisə zamanı vəziyyəti stabilləşdirmək, tərəfləri sakitləşdirmək mümkün olsa da, hər iki tərəf mövcud müqavilənin davam etməyəcəyinə beyinlərində qərar veriblər. Və ayrılıq məhz indi rəsmiləşir.
Conatan Ayitenin gedişinin səbəbi də oxşardı. Məşqçilər fransız hücumçunu heyətdə saxlamaq istəyirmiş. Lakin son oyunların birində Axundovla kəllə-kəlləyə gələn, əlbəyaxa olmaq həddinə çatan futbolçu belə rəhbəri olan klubda qalmaq istəməyib.