Ölkə futbolu
Keçmişi unutduranlar: göyərçinlə sünbül bir arada
Dünənin gözlənilməz xəbərlərindən biri “Sumqay?…
Dünənin gözlənilməz xəbərlərindən biri “Sumqayıt”ın loqosunu dəyişməsi haqda idi. 9 yaşlı klub birdən-birə belə qərar aldı və səbəbi izah edilmədi.
Əslində, addım başadüşüləndi. Klubun əvvəlki emblemi kolxoz sədrlərinin möhür-ştampına oxşayırdı, orijinallıq yox idi. Dairənin içinə salınmış top hər adamın kompüter proqramları vasitəsi ilə hazırlaya biləcəyi qədər sadəydi, üstəlik, hansısa məna, rəmz özəlliyi gözə dəymirdi.
İnsaf naminə, dünən təqdim edilən loqo daha yaxşıdı. 2019/2020 mövsümündən etibarən istifadə olunacaq emblemin üzərində yerləşən “Göyərçin” Sumqayıt şəhərinin rəmzi və sülhü təmsil edir. Aşağı hissədə yerləşən “Sünbül” isə bolluq, bərəkət simvoludu. Düzdü, sənaye şəhəri olan Sumqayıtın sünbüllə bir əlaqəsi yoxdu, üstəlik, göyərçin ilə sünbülün bir yerdə olması məntiqsizdi. Bəlkə də topa oxşayan qlobus daha yaxşı görünər, sülh istəyini təcəssüm etdirərdi. İndiki halda isə sünbülü dimdikləmək istəyən quşu izləyirik. Bu, bəlkə də gizli məna daşıyır, çünki Rəfiyev “Sumqayıt”a rahat yem gözü ilə baxır.
Reallıq odur ki, klub keçmişindən qurtulmağa cəhd edib və yeni loqo sadəcə, dəyişiklik naminə edilib. Əldə etdiyimiz məlumata görə, bunun üçün klub büdcəsidən həddindən artıq böyük vəsait ödənilib. 18 min manatın havaya sovrulduğunu da deyə bilərik, bu pulun 10-15 faizinə daha ideal loqo hazırlatdırmaq mümkün idi. Müsabiqə elan olunsaydı, elə sumqayıtlıların özü daha orijinal, daha sanballı variantlar təklif edərdi.
Emblemin üzərində klubun yaranma ilinin əks olunmaması da mənfi haldı. İndiki prezident Riad Rəfiyev sanki əvvəlki rəhbərliyini unutdurmaq niyyəti güdür. Və bu presedent son illər dəb düşüb. Bir çox klubda əvvəlki rəhbərliklərin unutdurulması üçün tarixə biganə yanaşılır, hətta arxiv materiallarına da diqqət yetirilmir, daha çox indikilərin fəaliyyət dövrü işıqlandırılır. Keçmişə qısqanclıq çox pis xəstəlikdi və əldən-ələ keçən klubların hamısında nümunələri var.
“Sumqayıt”a kimi son olaraq “Keşlə” bu addımı atmışdı. “İnter”i unutdurmaq üçün geyim rəngləri, formalar, emblem və hətta ad da dəyişdirilmişdi.
Bu baxımdan ilk dəyişiklik 2010-cu ilin martında reallaşmışdı. AFFA-nın yeni rəhbərliyi özlərindən əvvəlkiləri unutdurmaq üçün loqonu dəyişmiş və yeni səhifəyə başlamışdılar. O zaman yanar od formasında və top şəklində əks edilən Azərbaycan bayrağı üçün 50 min manat ödənilmişdi.
Sonradan bəlli oldu ki, yeni dizaynın müəllifi baş katib Elxan Məmmədovun atası Səlhab bəydi. Hər halda, mətbuatda çıxan bu xəbər nə o zaman, nə də sonra təkzib olunmadı. Azərbaycan Rəssamlıq Akademiyasının prorektoru, Rəssamlar İttifaqı sədrinin birinci müavini tanınan biridi, 2006-cı ildən xalq rəssamıdı. Onun əl işlərinin yüksək qiymətləndirilməsi gözləniləndi, lakin oğlunun çalışdığı qurumun loqosunun müəllifi olması birmənalı qarşılana bilməz.
İstənilən halda, loqo dəyişikliyinin səbəbi keçmişi unutdurmaq istəyi idi və buna qismən nail oldular. İndi də eyni yolu “Sumqayıt” davam etdirir. Loqosunu da eyni quruma, eyni adamlara sifariş verməklə…
FƏRİD
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-22 08:34
Musa “Yurqorden” dəftərini bağladı?
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”