Ölkə futbolu
Hər şey “Zirə” üçün?!
“Şüvəlan” fəaliyyətini dayandırması barədə r?…
“Şüvəlan” fəaliyyətini dayandırması barədə rəsmi bəyanat yayıb. Qəsəbə təmsilçisinin bu addımı sən demə, “Zirə”nin yaşaması naminə imiş.
Rəsmi bəyanatda yazılıb: "Uzun illərdən bəri Azərbaycanın Bakı şəhərinin Şüvəlan qəsəbəsini təmsil edən “Şüvəlan” Futbol Klubu bir çox futbol turnirlərində ölkəmizi təmsil edərək müxtəlif mükafatlar uğrunda apardığı mübarizə və qazandığı nailiyyətləri ilə Azərbaycan futboluna öz töhfəsini vermiş, habelə bir sıra yeniyetmə və peşəkar gənc futbolçuların yetişdirilməsində böyük əməyi olmuşdur. Buna baxmayaraq, son zamanlar Premyer Liqa komandaları arasında rəqabətin güclənməsi, o cümlədən “Şüvəlan” Futbol Klubunda səmərəli idarəetmənin həyata keçirilməsi kluba əlavə maliyyə mənbəyinin cəlb edilməsi zərurətini ortaya çıxarıb. Bu tələbləri nəzərə alaraq, “Silk Way Holding” ilə klub rəhbərliyi tərəfindən məsləhətləşmələr aparılıb və Bakıətrafı qəsəblər üzrə daha güclü, peşəkar və rəqabət qabiliyyətli klub ilə təmsil olunmaq məqsədi ilə qısa vaxt ərzində böyük nailiyyətlərə imza atan “Zirə” Futbol Klubuna dəstək olunması qərara alınıb.
Qeyd edək ki, Şüvəlan qəsəbəsində inşa edilmiş təlim-məşq bazası müasir infrastruktura və geniş potensiala malikdir. Bu baxımdan “Şüvəlan” Futbol Klubu mövcud maddi-texniki təminat və infrastrukturla “Zirə” Futbol Klubuna dəstək olacaq. İnanırıq ki, bu dəstək nəticəsində “Zirə” Futbol Klubu yaxın dövr ərzində daha yüksək nailiyyətlər əldə edərək, Azərbaycanda futbolun inkişafı naminə və azarkeşlərin etimadını doğrultmaq üçün əlindən gələni əsirgəməyəcək. Eyni zamanda “Zirə” Futbol Klubuna sponsorluğunu davam etdirəcəyini bəyan edən “Silk Way” şirkəti bundan sonra da, Azərbaycanda futbolun inkişafı naminə ölkəmizin beynəlxalq turnirlərdə layiqli təmsil olunması üçün maddi-texniki təminat və infrastruktur dəstəyini əsirgəməyəcəyini bildirib".
Bu bəyanat artıq rəsmən təsdiqləyir ki, “Şüvəlan” “Zirə”nin farm-klubu imiş. İndiyədək bu, gizli saxlanılırdısa, indi bəyanatda məhz bundan bəhs edilir.
“Şüvəlan” haqda bəyanatda yazılan pafoslu sözlərin gözdən pərdə asmaq üçün olduğunu da qeyd etməliyik. Bu klub mövcud olduğu qısa müddətdə futbolumuza hansısa töhfə verməyib, sadəcə, divizionda komanda sayı düzəldiblər. İndi isə sponsorların ayırdığı vəsait əvvəllər dəstək olduqları kluba yönəldilib. “Zirə”nin fəxri prezidenti Orxan Məmmədov bir əldə iki qarpız tuta bilmədiyindən, “qartallar” üçün lazımi maliyyəni təmin etməyi bacarmadığından çıxış yolunu bu addımı atmaqda görüb.
Bu addımı hardasa başa düşmək olar. Onsuz da “Şüvəlan”ın varlığı ilə yoxluğu bilinmirdi. 2 yarışda 2 sürünən komanda saxlamaqdansa, “Zirə”yə diqqətin ayrılması məntiqlidi. Lakin bunu əvvəldən də fikirləşmək olardı, o zaman bir neçə il boşa verilməzdi.
“Şüvəlan”ın futbol səhnəsindən silinməsiylə klubun bazası “qartallar”ın ixtiyarında olacaq. Eləcə baş məşqçi Adil Şükürov əvvəlki işinə – “Zirə” akademiyasına qayıdacaq. O gedəndən burada koordinator postu boş idi və Şükürovun dönüşü üçün “toxunulmaz qalmışdı”.
- Ölkə futbolu2024-04-30 09:15
“Qarabağ” Avropada 2-ci yeri bölüşdürür
- Ölkə futbolu2024-04-30 15:31
Riad Rəfiyevin çempionatı: hakimlər qışdan bəri “Sumqayıt”a 8 xal hədiyyə edib
- Ölkə futbolu2024-04-29 12:33
“Qarabağ” “Turan”a çata bilmədi
- Ölkə futbolu2024-04-29 20:00
“Baku Sportinq”dən növbəti darmadağın