Ölkə futbolu
“Topaz” “CBC Sport”un 2 milyonunu kəsdi
“Topaz” AFFA ilə əməkdaşlığa son vermək istəyir. A…
“Topaz” AFFA ilə əməkdaşlığa son vermək istəyir. Azərbaycanda yeganə mərc şirkəti daha assosiasiyanın müxtəlif layihələrinə sponsorluq etməyəcək.
Yeni rəhbərliyin gəlişindən sonra xərclərini azaldan şirkət, 2012-ci ildən adını Premyer Liqaya vermişdi. İndi isə Peşəkar Futbol Liqası ilə əməkdaşlığın davam etdirilməsi sual altına düşüb. Danışıqlar davam etsə də, yekun qərar verilməyib. Yəqin ki, növbəti mövsümün püşkatma mərasimində bu barədə açıqlama veriləcək. “Topaz” imtina etsə, təklif göndərən digər şirkətlərlə danışıq başlanacaq.
“Topaz”ın “CBC Sport”a vəsait ayırmayacağı isə dəqiqdi. Hər il 2 milyon manat xərcə düşən şirkət telekanalın xərclərinin 70-80 faizinin onların boynuna yükləndiyini, təsisçi və sahib olan SOCAR-ın çox cüzi məbləğ xərclədiyini dəqiqləşdirdikdən sonra layihədən çəkilib. Son illər şirkətin qazancındakı azalma təbliğatla tərs mütənasib olduğundan bu qərar daha rahat qəbul edilib.
“Topaz”ın addımını başadüşülən saymaq olar. Düzdü, bu şirkət pul xərcləməyə borcludu. Ölkədə bu sahə yalnız onların monopoliyasına verilib, başqa mərc kontorlarının açılmasına qadağa qoyulub, istədikləri şərtləri diqtə etmək imkanı yaradılıb. Bu səbəbdən hədsiz qazanc imkanı verilən “Topaz” birbaşa futbola pul xərcləməyə məhkumdu. Lakin işin səhv olan tərəfi bu məbləğin yalnız AFFA-ya, ona bağlı qurumlara yönəldilməsidi. Mətbuata diqqət yoxdu, sosial layihələrlə bağlı addımlar görmürük. Yalnız bir telekanalı saxlamaqla işi bitmiş sayırlar.
Bundan sonra “Topaz”ın daha doğru addımlar atacağına ümid edirik. Ola bilsin, “CBC Sport”a verilən 2 milyon manat həddindən artıq böyük məbləğdi. Bu vəsaitin müəyyən hissəsini dayandırmaq olar. Əvəzində şirkət mütləq başqa layihələrlə gündəmə gəlməlidi. Hər şeyi monopoliyaya alıb, heç nə xərcləməməklə uzaq getmək olmaz.