Ölkə futbolu
Mahir revanş istəyir: “Daxilən “yanırıq”, amma büruzə vermirik”
Belə qələbəni Mahir Emreli özü də gözləmirmiş. &…
Belə qələbəni Mahir Emreli özü də gözləmirmiş. “Qarabağ”ın futbolçusu Premyer Liqanın III turunda “Səbail”ə səfərdə 4:0 hesabıyla qalib gəldikləri oyundan sonra verdiyi müsahibədə bunu etiraf edib.
– Bu cür hesab gözləmirdik. Çünki həftəçi “Linfild”lə Avroliqa oyunundan sonra yorğunluq var idi. Ancaq bu, bəhanə deyil. Əsas odur ki, qələbə qazandıq. Hesabdan da önəmlisi, üç xalı əldə edərək rəqiblərimizdən aralanmağımızdı. Çalışacağıq ki, bunu sona qədər qoruyub saxlayaq.
– Düşünmürsən ki, rahat qələbə qazandınız?
– Rahat qələbə olmur. Sadəcə, bəzən bizim günümüz olur, bəzən də rəqibin. Yəqin ki, bu gün bizim günümüz idi deyə, rahat oyun alındı. Ancaq çətinliklərimiz də oldu.
– Son 7-8 rəsmi görüşünüzü nəzərə alsaq, bu oyunda sanki məşq edirdiniz…
– Asan oyun olmadı. Psixoloji durum yaxşı olanda, komanda yaxşı yığılanda yaxşı şeylər etmək olur. Təlim-məşq toplanışını da yüksək səviyyədə keçirmişik. Bununla da bağlı ola bilər.
– Razısan ki, ötənmövsümki “Səbail”i bu cür rahat məğlub edə bilməzdiniz?
– Bu haqda nəsə deməyim doğru olmaz.
– Avropa Liqasının qrup mərhələsindəki şanslarınızı necə dəyərləndirirsən?
– Əvvəlki illərlə müqayisədə indiki rəqiblərin "dişimiz"ə görə olduğunu deyə bilərik. Amma buna görə oyunlara rahat çıxmağın da zərərlərini görərik. Burada bir nüans var ki, qrupdakı iki rəqibi tanıyırıq və onlara qarşı oynamışıq. Düzdü, “Düdelanj”la əvvəllər oynamışıq, hər halda, meydanda onu da görmüşük. Bu da hardasa üstünlüyümüzdür.
– Qrupa APOEL də düşəndə, sizdə revanş hissi yarandı?
– Əlbəttə ki, daxilən “yanırıq”, amma bunu büruzə vermirik. Çalışırıq ki, soyuqqanlı yanaşaq. Çünki həddən artıq çox istəkli olanda bunun ziyanını görərik. Ona görə soyuqqanlı olmaq lazımdı.
– İlk oyununuz evdə “Sevilya”ya qarşı olacaq. Bunun hər hansı müsbət və ya mənfi tərəfi var?
– Bu barədə heç vaxt düşünməmişəm. Ancaq heç kimdən çəkinmirik. Rəqib kim olursa-olsun, oynayacağıq. Biz də artıq bir neçə ildir ki, adımızdan söz etdirməyi bacarmışıq. Çıxıb öz futbolumuzu oynayacağıq.
– Qarşıda millimizin Uels və Xorvatiyaya qarşı oyunları var. Macarıstan və Slovakiyaya evdəki məğlubiyyətdən sonra azarkeşlərdə də milliyə inam qalmayıb. Yenə biabırçı hesablar olacaq?
– Əvvəldən proqnoz verməyi xoşlamıram. Xalqımız, ölkəmiz üçün oynayırıq. Ən yaxşısını etməliyik ki, onları sevindirək. Məğlub olmağı kim istəyər ki? Oyundan əvvəl 20-25 gün toplanışda olursan, hazırlaşırsan. Məğlub olanda özümüz də üzülürük, insan özünüzü çox pis hiss edir.
– Transferinlə bağlı nə yenilik var?
– Baş məşqçi Qurban Qurbanov və digər məşqçilərlə məsləhətləşirəm. Daha yaxşı yerlərə getməyimi onlar məndən çox istəyirlər. Getmək xatirinə komandadan ayrılmaq istəmirəm. Düşünürəm ki, transferim məni böyüdüb, yetişdirən insanların da ürəyincə olsun. Onlar nə qərar verirlərsə, hörmətlə yanaşıram. Nə məsləhət görürlərsə, onu edəcəm. Klubla müqaviləm var. Ən azı qışa kimi kollektivdəyəm.
- Premyer-liqa2024-05-04 21:21
“Neftçi” “Qarabağ”a böyük hesabla uduzdu
- Milli komanda2024-05-04 15:39
Millimiz UEFA İnkişaf Turnirində ikinci oyununda da uduzdu
- Premyer-liqa2024-05-04 18:23
“Kəpəz”dən “Sumqayıt”la əzmkar heç-heçə
- Premyer-liqa2024-05-04 18:59
Samir Abasov: “Bu, “Qarabağ”la matçdakı yorğunluqdan irəli gələ bilər” – VİDEO