“Bir xal da yaxşı nəticə sayılacaq” – Abbasov

“Səbail”in müdafiəçisi Ürfan Abbasovun futbolinfo.az saytına müsahibəsi

– “Səbail” mövsümə yaxşı başlasa da, son zamanlar xallar itirir. Bunun səbəbini nədə görürsən?
– Doğrudan da çempionata yaxşı başlamışdıq. Amma davamını gətirə bilmədik. 3 oyun qələbələrdən sonra məğlubiyyətlər oldu. Düzdü, oyun baxımından dəyişən nəsə yoxdu. Sadəcə, əlimizə düşən fürsətləri istifadə edə bilmirik desəm, daha doğru olar. Oyunlardan ilk qolu vursaq, hər şey başqa cür olar. Qol vura bilmirik, qol buraxdıqdan sonra da toparlanmağımız çətin olur.

– Mövsümün əvvəlində baş verən maddi problemlərin təsiri deyəsən hələ də komandaya təsir edir?
– Maddi problemlər oldu, amma bu o demək deyil ki, ona görə düşüşdəyik. Hazırda belə problem yoxdu. Maaşlarımızı da, “premyalarımızı” da vaxtında alırıq. Ciddi problemimiz yoxdu.

– Qarşınıza hədəf qoyulub, yoxsa…?
– Əlbəttə ki, hər bir komandanın qarşısında hədəf və məqsəd var. Bizim də məqsədimiz avrokuboklara vəsiqə verən yerlərdən birini tutmaqdı. Bunun üçün sona qədər mübarizə aparacağıq.

– Qarşıda “Qarabağ”la ağır oyun var və bu matçda qələbə ümid edirsiz, yoxsa 1 xal yaxşı nəticə sayılacaq?
– “Qarabağ”la oyuna hazırlaşırıq. Yaxşı nəticə qazanacağımıza ümid edirik. Desəm ki, 3 xaldan başqa heç nə bizi qane etmir, bu, düz çıxmaz. 1 xal da bizim üçün yaxşı nəticə sayılacaq. “Qarabağ”, özünüz də bilirsiniz ki, çempionatda ən güclü komandadı. Onlardan bir xal da almaq böyük nəticə sayılacaq.

– Ötən mövsüm “Səbail” daha güclü idi və çempionat daha maraqlı idi, yoxsa bu mövsüm daha maraqlıdı?
– Bu mövsüm də pis deyil, amma ötənilki çempionat daha maraqlı idi.

CAVAD