Layihə
İK-nın iclasında klubların hesabatı müzakirə olunacaq
AFFA İcraiyyə Komitəsinin (İK) növbəti iclasında klubların…
AFFA İcraiyyə Komitəsinin (İK) növbəti iclasında klubların maliyyə hesabatları ilə bağlı məsələ də müzakirə olunacaq. Bunu futbolinfo.az saytına açıqlamasında qurumun mətbuat xidmətinin rəhbəri Firuz Abdulla deyib.
İK-nın 2019-cu ilin yekun iclasının vaxtı dəqiqləşməyib. Firuz bəyin dediyinə görə, tədbir gələn həftə baş tutmalıdı. Lakin bu həftənin cümə günü də iclas reallaşa bilər. Komitə üzvləri həm də müxtəlif vəzifələrdə çalışdığından vaxt onların qrafiki nəzərə alınaraq dəqiqləşəcək.
İK-da konkret olaraq klubların onlara uşaq futboluna görə ayrılan vəsaitin necə xərcləməsi barədə hesabatları müzakirə ediləcək. Belə ki, 2016/17-ci il mövsümünü əhatə edən UEFA-nın “Həmrəylik ödəmələri və uşaq futbolunun inkişafı” proqramı çərçivəsində qeyd olunan mövsümdə Azərbaycan Premyer Liqasında çıxış etmiş, lakin UEFA Çempionlar Liqası və Avropa Liqasının qrup mərhələsinə vəsiqə qazanmamış klubların hər birinin hesabına 507 579.57 avro köçürülmüşdü.
Bu vəsait yalnız uşaq futbolunun inkişaf etdirilməsi məqsədi ilə xərclənə bilərdi. Lakin klublarımızda uşaq futbolunun hazırkı durumunu nəzərə alsaq, maliyyənin fərqli istiqamətlərə yönəldildiyi, təyinatı üzrə xərclənmədiyi gün kimi aydındı. Kimisi transferlərə, kimisi digər məqsədlərə pul dağıdıb.
Təbii ki, AFFA bununla bağlı klublardan izahat istəyib. Məhz onların təqdim etdiyi hesabat İK-da müzakirə olunacaq. Şəffaflığa necə əməl edildiyini bilmirik, amma Firuz bəy AFFA-nın baş katibi Elxan Məmmədovun bununla bağlı fikirlərini bizim üçün öyrəndi. Məlum oldu ki, İK-dakı müzakirələrdən sonra hesabatlar barədə mətbuata detallı bilgi veriləcək.
UEFA-nın “Həmrəylik ödəmələri və uşaq futbolunun inkişafı” proqramı çərçivəsində “Zirə”, “Keşlə”, “Sumqayıt”, “Səbail”, “Neftçi”, “Kəpəz” və “Qəbələ” bu yardıma sevinmişdi. “Qarabağ” Çempionlar Liqasının qrupuna vəsiqə qazandığından və bu maliyyənin gəlməsinə səbəbkar olduğundan kənarda qalmışdı. Ağdamlıların hesabına köçən vəsait ayrı idi.
“Sabah”a debütant olduğu üçün yardımdan pay düşməmişdisə, artıq elitanı tərk edən “Kəpəz”ə ayrılan pulun hara sərf olunduğu maraq doğurur. Çünki gəncəlilər birinci diviziona düşdükdən sonra klubun ümumi büdcəsi 300 min manata qədər azaldıldı. Belədə UEFA-dan gələn 1 milyon manat civarında pulun bu klubun uşaq futboluna sərf ediləcəyi inandırıcı görünmür. AFFA-nın rəsmi açıqlamasında qeyd olunmuşdu: “Kəpəz” klubu üçün nəzərdə tutulmuş vəsait klubun aylıq cari xərclərini ödəmək üçün növbəti aylarda hesabına köçürüləcək”.
Əslində, AFFA özü bu məqamda vəsaitin təyinatı üzrə xərclənməsini təmin etmir. Gəncə klubunu assosiasiya maliyyələşdirirsə, sözügedən pul cari xərclərin ödənməsinə sərf edilməməlidi. Ümid edirik, İK-nın iclasında bunun açıqlaması da veriləcək.
FƏRİD
- Ölkə futbolu2024-04-13 08:35
Leandro Azərbaycan dilini öyrənib: “Qarabağ”da yaşadıqlarım mənim üçün gözəl hekayədir”
- Premyer-liqa2024-04-13 20:52
“Neftçi” “Araz-Naxçıvan”ı darmadağınla yola saldı
- Milli komanda2024-04-12 18:00
Millinin Gürcüstanla oyunlar üçün heyəti açıqlandı
- Ölkə futbolu2024-04-14 08:00
“Turan Tovuz” avrokubok mübarizəsinə qayıtdı