Dünya futbolu
Sürpriz hesab, layiq olduğumuz yer
“Qarabağ” fiaskonun eşiyindən döndü. Səfərd…
“Qarabağ” fiaskonun eşiyindən döndü. Səfərdə 4:1 hesabıyla yendiyimiz “Düdelanj”a evdə məğlubiyyətin başqa adı yox idi. Bu, ağdamlıların qrup sonuncusu olmasını şərtləndirəcəkdi.
Amma oyuna artırılan ilk dəqiqədə “Qarabağ” biabırçılıqdan qurtuldu və qrupda səviyyəcə üstün olduğu yeganə rəqibdən öndə qalmağı bacardı. 3-cü pillə püşk atılarkən proqnozlaşdırdığımız yer idi və ağdamlılar bundan yaxşısını ancaq arzulaya bilərdi. Qrup oyunlarının gedişində buna şans var idi, amma APOEL-lə matçlardakı uğursuzluq qrupda hamının gücünə görə mövqe tutmasını şərtləndirdi.
“Qarabağ”da fiziki, psixoloji yorğunluq aşkar hiss olunur, Premyer Liqa matçları da göstərdi ki, yaydan bu yana dayanmadan oynayan futbolçuların istirahətə ehtiyacı var. Amma hətta bu da komandanın həvəskar “Düdelanj”ı yenməməsinə bəhanə olmamalıdı. Oyunun əvvəlində rəqibə saymazyana yanaşıldı, futbolçular heç cür motivasiya oluna bilmədilər. İkinci hissə başlayan kimi Qara Qarayevin qırmızı vərəqə alması, ardınca Lüksemburq klubunun adi epizodda qol vurması ağdamlıları ayıltdı.
Monoton oyun tərzi ilə heç nə edə bilməyən meydan sahibləri təzyiqi artırdı, xeyli qol epizodu yaratdı və onlardan yalnız birindən yararlandı. Bərabərlik qolu sonradan meydana çıxan iki yeni transferin fərdi bacarığının nəticəsi oldu.
Qurban Qurbanov qarşıdakı kubok matçlarında “Keşlə”yə qarşı fərqli nələrsə fikirləşməlidi. Əks halda, qış fasiləsinə yaxşı əhval-ruhiyyədə getmək mümkün olmayacaq. Fasilə dönəmində isə ağdamlılar bir çox şeyləri dəyişməli, yayın planlarını cızmalıdı. Çempionatda rəqabət yüksək deyil, qısa istirahətdən sonra komanda özünə gələcək və çempionluq mübarizəsində əsas favorit olacaq. Lakin yeni avrokubok mövsümündə ciddi çətinlik çəkəcəyik. “Qarabağ” ölkə daxilindəki rəqabətsizlik nəticəsində aşkar şəkildə zəifləyib.
Dünən fiaskodan qaça bildik. Amma bu gedişlə Azərbaycanın qrup mərhələsinə ardıcıl vəsiqə qazanmaq seriyası qırıla bilər. Ən güclümüz “Qarabağ”dısa, dünənki futbol ölkə adına ümid vermədi. AFFA İcraiyyə Komitəsi bu gün yığışanda dünən aldığımız bu siqnalı da yadda saxlasın.
CAVAD