Dünya futbolu
“Qəbələ” işin yarısını gördü, “Sabah”…
Sabahı qaranlıq olan “Qəbələ”di, amma “Sabah&rd…
Sabahı qaranlıq olan “Qəbələ”di, amma “Sabah”ın vəziyyəti daha pisdi. Əyalət təmsilçisi maliyyə sıxıntısı içindədi, qışdan sonra necə yaşayacağı bilinmir, əvəzində paytaxt klubunda nəticə çox pisdi.
Dünən ölkə kuboku uğrunda ¼ final mərhələsi başladı. İlk oyunlara Qəbələdə start verildi və meydan sahibləri qələbə qazandı. 3:0 hesabının revanş görüşündə əvəzini çıxmaq mümkündü, amma realist olsaq, “Sabah”ın yarımfinalda olmayacağını deyə bilərik. Çünki komandanın oyununda xaos aşkar görünür, bu əhvalla Elmar Baxşıyevin yetirmələrini təslim etmək olmayacaq.
“Sabah” ilk yarını çox pis keçirdi və 2 dəfə cəzalandı. Meydan sahiblərinin az qala hər hücumu rəqib qapısı önündə təhlükəyə çevrilirdi. Düzdü, 2-ci qol ofsayd səbəbindən hesaba alınmaya bilərdi, amma epizodun təkrarına baxanda hakimləri qınamırsan. Demək olar, eyni xətt üzrə olan futbolçulardan hücum edənə üstünlük verilib.
Fasilədən sonra rollar dəyişdi. Qonaqların heyətindəki dəyişikliklər onları diqtə edən tərəfə çevirdi. Anar Nəzirov azı 3 dəfə real qolun qarşısını aldı, müdafiəçilər də kritik müdaxilələrlə seçildi. Əvəzində kəsərli əks-hücumların birində “Qəbələ” növbəti qolu vurub, mərhələni adlamaq üçün üstünlüyünü möhkəmləndirdi.
“Sabah” rəhbərliyi çempionatdakı uğursuzluqlar üzündən 3 baş məşqçiylə işləmək məcburiyyətində qalıb. Nəticələr nisbətən yaxşılaşıb, komanda avrokubok zonasından uzaq deyil. Lakin Jelko Sopiç gələni komanda qola həsrət qalıb. Divizion klubu ilə oyun istisnadı, Premyer Liqa təmsilçiləri ilə matçlarda vəziyyət getdikcə pisləşir – 0:1, 0:2, 0:3.
Ən önəmlisi “Sabah”ın öz oyununu itirməsidi. Xorvat məşqçi Filip İvanoviçdən dayaq yarımmüdafiəçisi “düzəltmək” istəyir. Amma serb müdafiəçinin səhvləri “Qəbələ”nin qolları zamanı işə yaradı. Sopiçin ötən həftə təriflədiyi Şakir Seyidov da sanki oyunda yox idi və mərkəz xəttini rahat keçən meydan sahibləri istədiyi futbolu diqtə edirdi. Təsadüfi deyil, Şakir əvəzləndikdən sonra qonaqlar normal futbol oynamağa başladı.
Ümumiyyətlə, Jelkonun heyət seçimini müzakirə etməyə dəyər. Lakin bunu klub rəhbərliyi etməlidi. Kubok “Sabah”ın avrokubok yolunda ən real şansı idi, püşkdə də komandanın bəxti gətirmişdi. Amma Sopiçin eksperimentləri üzündən kubok əldən çıxmaq üzrədi, bu gedişlə çempionatda da uğur qazanmaq olmayacaq. Qış fasiləsində transferlərdə ehtiyatlı olmaq, xorvatın hər dediyinə əməl etməmək lazımdı.
Doğrusu, onun ölkəmizdə böyük perspektivi yoxdu, səhv seçimdi, zaman da bunu sübut edəcək. Necə ki, edir. Jelko otən oyunda futbolçuları tənqid etməklə böyük səhv etdi, haqsız sözlərini ona bağışlamayacaqlar.
Dördü start heyətində olmaqla, akademiyasının 7 futbolçusundan bu matçda yararlanan “Qəbələ”nin oyununu düzəltdiyini demək olar. Artıq yenilənmiş heyət əla ansambla çevrilib. Xüsusilə İbrahima Niassenin gəlişi ilə “qırmızı qaralar”ın yarımmüdafiə xətti çox güclənib. Heyətdəki 1-2 yararsız oyunçunu qışda yaxşı legionerlərlə əvəz etmək mümkün olsa, “Qəbələ” Avropa Liqasına vəsiqə əldə edə bilər.
Yarımfinalda bu cütün qalibinə rəqib olacaq komanda Zirədə bəlli olacaq. Dünən eynadlı komandanın “Səbail”lə Bayıldakı görüşündən sonra kiməsə böyük üstünlük vermək olmur. İlk yarısı xüsusilə darıxdırıcı keçən matçda qapılara qol vurulmadı. Meydan sahibləri heyətdəki çox ciddi itkilərə rəğmən, 2 dəfə dirəyi nişan aldı, “Zirə”nin bəzi epizodlarda bəxti gətirdi. Bununla belə, “qartallar” zəif oyunla da son çempionat matçında 4:1 hesabıyla yendikləri rəqib qarşısında cüzi üstünlük qazandı.
Bu futbolçuların əksəriyyətinin qışdan sonra “Səbail”də olmayacağı dəqiqdi. Onların 3 gündən sonra Zirədə meydana hansı əhvalda çıxması çox önəmlidi. Hələlik “dənizçilər”in vəziyyəti dəyişmək imkanı var.
AĞA
- Ölkə futbolu2024-04-22 08:00
İddialıların “autsayder ovu”
- Ölkə futbolu2024-04-22 08:34
Musa “Yurqorden” dəftərini bağladı?
- Ölkə futbolu2024-04-23 12:31
AFFA-da gündəm: 12 komandalı Premyer Liqa, aşağı liqa klublarına dəstəyin artırılması
- Milli komanda2024-04-23 16:30
Milli komandaya məşqçi seçimi: “Ad açıqlaya bilmərik”