Ölkə futbolu
Abbasovdan Bordinə daha bir zərbə
Azərbaycan kuboku uğrunda ¼ final mərhələsinin ilk oyunlar…
Azərbaycan kuboku uğrunda ¼ final mərhələsinin ilk oyunları başa çatdı. “Qəbələ”nin böyük üstünlük qazandığı matçlardan sonra yalnız “Sabah” hamıdan çətin durumdadı. Digər komandaların cavab matçlarında durumu lehinə çevirmək üçün imkanları var.
Püşk turnir cədvəlinin ikinci yarısında qərarlaşan komandaları srağagün üz-üzə gətirdisə, dünən də liderlər qarşılaşdı. Zirvədəki “Qarabağ” 3-cü olan “Keşlə”ni, ondan öncəki “Neftçi “dördlüy”ə girməyi bacarmış “Sumqayıt”ı qəbul etdi. Hər iki matçda fasilədən həmən sonra vurulan qol yeganə oldu – birində qonaqlar, digərində meydan sahibləri sevindi.
“Bakcell Arena”dakı oyunun aşkar favoriti olan “Neftçi” yenə azarkeşlərini üzdü. Qeyri-sabit oynayan bakılılar sərgilədiyi futbolla məğlubiyyətə layiq idi. Roberto Bordinin adətinə sadiq qalıb, “heyətlə oynaması” qonaqların işinə yaradı. İndiyədək heç vaxt ardıcıl 2 matçda eyni futbolçulara güvənməyən italiyalı baş məşqçinin eksperimentləri üzündən “Neftçi” kubokda ağır zərbə aldı.
Matç göstərdi ki, futbolçuların uyumu, anlaşması bərbaddı. Saysız top itkiləri, kombinasiyalardakı anlaşılmazlıq “Sumqayıt”ın matçın böyük hissəsində daha üstün oynamasına imkan verdi. Və bu, birbaşa məşqçi bacarıqsızlığının nəticəsidi. Bu qədər zəngin heyətdən normal komanda formalaşdıra bilməməyin başqa adı yoxdu. Hətta dünən ehtiyatda qalanlarla rahatca çempionluq üçün oynamaq olar.
Təkcə Evangelos Platellasın adını çəkmək kifayətdi. Bu futbolçu meydana çıxdıqdan sonra “Sumqayıt” son 20 dəqiqəni qapısına sıxışdırıldı. Hətta qonaqlar ardıcıl 2 müdafiəçini meydana buraxmalı oldu. Daim start heyətinə həsrət qalan yunanın bəlli səviyyəsi var, amma məşqçi ondan yararlanmağı bacarmır.
Əvəzində Ayxan Abbasov Bordinə dərs keçməyə davam edir. Ötən mövsüm çempionatda italiyalının kabusuna çevrilən gənc məşqçi “Neftçi”ni kubokdan kənarlaşdırmışdı. Dünən də Abbasov daha bir uğurlu oyunu başa vurdu. Açıq futbola üstünlük verən qonaqlar irəli xəttdə pressinq etməklə bakılıların nəfəsini kəsdi. Təhlükəli epizodların sıralanması azarkeşlərin də səbrini daşırmışdı. Ustalıqla reallaşdırılan qol isə şedevr idi. Məşqlərdə sınaqdan keçirilmiş kombinasiya zamanı bakılılar rəqibi seyr etməklə məşğul oldu.
“Sumqayıt” yarımfinala adlasa, qışa qədərki dövrün ən böyük sürprizinə imza atacaq. Ən aşağı büdcəli komanda çempionatda da gözləniləndən uğurludu. Amma “Qarabağ”a yeganə məğlubiyyəti yaşatmış komandanın hələ daha bir matçı var. Cavab oyunu daha çətin keçəcək. Bordin heyəti, taktikanı düzgün qursa, “Neftçi” səfərdə böyük hesabla qalib gələcək gücdədi. Son saniyələrdə Elvin Cəfərquliyevin əldən verdiyi yüzfaizli şans paytaxt təmsilçisi üçün stimul olmalıdı. Epizod qola çevrilsəydi, Abbasovun yetirmələri daha şanslı olardı, amma cinah müdafiəçisinin sevinməsinə təcrübəsizliyi mane oldu.
“Qarabağ” da qalib gəldi. Lakin 1:0-a sevinmək yox, üzülmək lazımdı. “Keşlə”nin heyətində o qədər itki var idi ki, Tərlan Əhmədov start “11-liy”ini çətinliklə düzəltmişdi. Xüsusilə müdafiənin mərkəzindəki 2 legionerin heç birinin oynamaması ağdamlılar üçün şans idi. Amma təqaüd yaşındakı Rəşad Sadiqov özünə yad olan mövqedə təsadüfi hallarda heyət üzü görən Tərlan Quliyevlə uğurlu oynadı. Meydan sahiblərinin təzyiqi o qədər az idi ki, bəzən dayaq oyunçularının yardımı olmadan da hücumların qarşısını ala bilirdilər.
Əsas hücumçusu oynamayan “Keşlə” matçın gedişində Ruslan Qurbanov və Sezar Meza Kollini də zədə üzündən itirdi. Lakin bu, hesabın böyüməsinə şərait yaratmadı. İsmayıl İbrahimlinin Tərlan Quliyevi aldadıb vurduğu zərbədən sonra reallaşan qol oyunda yeganə oldu. Topla daha çox davranan “Qarabağ” bundan artığını bacarmasa da, cavab matçına sərfəli nəticəylə yollandı.
FƏRİD
- Ölkə futbolu2024-05-10 08:00
“Yurqorden” Musa Qurbanlıya qiymət qoydu – 10 milyon kron
- Ölkə futbolu2024-05-10 09:21
“Əks təqdirdə fanatlar Şeydayevi qəbul etməyəcək”
- Dünya futbolu2024-05-10 16:37
AÇ-2024-ün rəsmi mahnısı təqdim edildi – VİDEO
- Digər idman növləri2024-05-09 12:52
Kramarenkonun qızı millimizdə? – “Bu, ölkəmə xəyanət olar”