Ölkə futbolu
Diskvalifikasiya var, həbs yox?!
I Divizionda danışılmış oyunlara bağlı araşdırma davam etdiri…
I Divizionda danışılmış oyunlara bağlı araşdırma davam etdirilir. 2017-2018 mövsümündə aşağı dəstədə mübarizə aparmış "Binə"nin prezidenti Teymur Həsənli ilə klubda baş məşqçi çalışmış, hazırda "Keşlə"nin fiziki hazırlıq üzrə məşqçisi olan Mehman Babayev də saxlanılıb.
Məsələ ilə bağlı "Qafqazinfo"ya açıqlama verən "Binə"nin prezidenti Teymur Həsənli deyib: "Düzdür, danışılmış oyunlarla bağlı araşdırma çərçivəsində izahatımın alınması üçün "Bandotdel"ə dəvət olunmuşam. İzahat yazdıqdan sonra həmin gün oranı tərk etmişəm. Mənimlə yanaşı, Mehman Babayev də izahat verib və həmin gün oradan ayrılıb. Danışılmış oyunlarda iştirakım müzakirə mövzusu belə ola bilməz".
Həsənlinin açıqlaması da göstərir ki, proses davam edir. Təbii ki, hələlik heç kimin həbsindən söhbət getmir. Şübhəli bilinənlər danışdırılır, günahı olanlar diskvalifikasiya edilir. Necə ki, AFFA İntizam Komitəsi ötən həftə 28 nəfərin futbolla məşğul olmasına qadağa qoydu. İndi daha böyük dəstə araşdırmaya cəlb edilib, onlardan 40 nəfərinin haqqında ölçü götürüləcəyi gözlənilir. Demək olar, qərar verilib, AFFA tezliklə rəsmi açıqlama verməlidi.
Maraqlıdı ki, danışılmış oyunlarla əlaqəsi olan 28 nəfərin siyahısı dəqiqləşsə də, onlara futbolla məşğul olmaq qadağan edilsə də, hələlik heç biri həbs olunmayıb, bununla bağlı hüquq-mühafizə orqanlarının rəsmi məlumatı yoxdu.
Deyilənlərə inansaq, bu məsələlərdə əsas iştirakçı olanlar “müxtəlif vasitələrlə” canlarını qurtarıblar. Amma xahişlər, tapşırıqlar bir yerə qədərdi. Həbs olunan olmasa, verilən cəza qərarlarının gözdən pərdə asmaq üçün olduğunu düşünəcəyik. Cinayət varsa, cəza da olmalıdı, cinayət yoxdursa, diskvalifikasiya da olmamalıdı. İndiki halda müəyyən şəxslərə hansısa günahlarına görə futbolla məşğul olmaq qadağan edilib, ancaq nədənsə əməllərində həbs olunmaları üçün cinayət tərkibi tapılmır.