Premyer-liqa
Elnur Allahverdiyev: Adam kişi olar!
“Qəbələ”nin müdafiəçisi Elnur Allahverdiye…
“Qəbələ”nin müdafiəçisi Elnur Allahverdiyevin Futbolinfo.az saytına müsahibəsi
– "Qarabağ"la oyun haqda fikirlərinizi bildirərdiniz…
– Oyun gərgin keçdi. Biz bilirdik ki, güclü komandaya qarşı oynayırıq. Hamı da bilirdi ki, "Qarabağ" güclü komandadı. Amma biz də güclü komandayıq. Çempionluğa iddialı olmağımıza baxmayaraq, məğlub olduq. İlk hissədə çox pis oynadıq. Orta sahədə oynayan futbolçularımız çox pis çıxış etdilər. Lakin ikinci hissədə komanda sübut etdi ki, biz oyunda qələbə qazana bilərik. Mənim fikrimcə, Azərbaycan çempionatında bu cür oyun olmamışdı.
– Komandanızın gec ayılmasının səbəbi nə idi?
– Mənə elə gəlir ki, buna səbəb ikinci hissədəki əvəzetmələr oldu. Bu dəyişiklik elə birinci hissədə olmalıydı. Artıq geci idi.
– Müdafiədə kobud səhvlər buraxırdınız…
– Biz necə qol vurduq, amma necə qollar buraxdıq… Yenə deyirəm, məğlubiyyətimizin əsas səbəbi mərkəz oyunçularımız oldu.
– Yuri Syomin buraxılan qollarda müdafiəçilərin fərdi səhvlərinin olduğunu bildirdi…
– Bilirsiniz, qol buraxanda müdafiənin günahı var. Əgər mən müdafiədəyəmsə və qol buraxırıqsa, deməli bu, müdafiənin günahıdı. Amma futbolu tək müdafiə oynamır axı. Mənim fikmrimcə, "Qarabağ"a heç müdafiə xətti lazım deyil. Çünki onların o cür mərkəz oyunçuları var.
– Reynaldo ilə mübahisənizə “Qarabağ”ın məşqçilər korpusundan sərt reaksiya gəldi…
– Mənə dedilər ki, qəsdən vurmuşam. Amma mən bunu bilə-bilə etmədim. Futboldu, hər şey ola bilər. O da bir futbolçudu. Mən onu qəsdən etsəydim, o 5 ay futbol oynaya bilməzdi. Nəyə görə bunu etməliyəm ki? Mən də onlara başa saldım ki, bunu qəsdən etməmişəm.
– Oyun ərzində "Qarabağ" azarkeşləri sizə təzyiq göstərirdi…
– Mən başa düşmədim ki, bunu niyə etdilər. "Qarabağ" azarkeşlərinin niyə belə etdiyini deyə bilmərəm. Onlarla heç bir problemim yoxdu. Amma onu bilirəm ki, kimsə onları öyrədib.
– Yəni bu, sizə qarşı təxribatdı?
– Bəli… Əgər belə şey varsa, Allaha tapşırıram onları. Orada azarkeşlik edənlərin çoxu da bir manat qarşılığında qışqırırlar. Bunu tək mən bilirəm. “Qarabağ” sevən olublar, müharibə başlasa, hamısı qaçıb gizlənər. Onlara bir dənə bunu deyirəm. Adam kişi olar!
RÖVŞƏN ƏHLİMANOĞLU