Premyer-liqa
Vaqif Sadıqov: AZAL-da problemlər var
AZAL-ın baş məşqçisi Vaqif Sadıqovun Futbolinfo.az saytın…
AZAL-ın baş məşqçisi Vaqif Sadıqovun Futbolinfo.az saytına müsahibəsi
– AZAL son oyunda autsayder "Sumqayıt"la bir xala razılaşdı. Bu xal itkisinə nə səbəb oldu?
– Çempionatımızda autsayder yoxdu. Hər kəs qələbə qazanmaq, yuxarı pillələrdə qərarlaşmaq istəyir. Hər kəs kimi, biz də meydana 3 xal üçün çıxırıq. Amma futboldu, elə olur ki, alınmır. Sonuncu pillə anlayışı var və "Sumqayıt" da bu mövqeyi tərk etmək üçün mübarizə aparır. Heç-heçə oynadıq, amma hesab edirəm ki, bizim qol epizodlarımız daha çox olmuşdu. Üstünlük bizdə olsa da, qələbə qazana bilmədik və iki xal itirdik.
– 7-ci turda "Xəzər Lənkəran" (1:3) məğlubiyyətindən sonra Cahangir Həsənzadə meydana çıxmır. Bunun səbəbi nədi?
– Ona görə ki, qapıda iki qapıçı dura bilməz.
– Yəni, Həsənzadəyə etibar azalıb?
– Mən belə deməzdim. Sadəcə, bizdə eyni səviyyədə qapıçılar var. Ruslan Məcidov da inamlı təsir bağışlayır və ona görə AZAL-ın qapısını qoruyur. Burada heç bir problem axtarmaq lazım deyil. Cahangir təcrübəli, çox yaxşı qapıçıdı. Bundan başqa komandanın kapitanıdı və futbolçularımızın yanında olması bizə üstünlük verir. Ancaq yenə deyirəm ki, tələsməyək. Çünki hər iki qapıçı AZAL-a böyük köməklik edə bilər.
– Bu həftə AZAL hazırkı lider "Qarabağ"la qarşılaşacaq. Komandanın hazırlıqları necə gedir?
– Zədəlilərimiz, kadr problemlərimiz var. O kadr, zədəli problemlərinə cəzalı Oskar Klava da əlavə olundu. Hələlik komanda 6 futbolçudan məhrumdu. Sabah ola bilər ki, Vladimir Boqdanoviç komandayla fiziki məşqlərə başlasın. Nə dərəcədə özünü doğruldacağından asılı olaraq, "Qarabağ"la meydana çıxıb-çıxmayacağına qərar veriləcək. Digər zədəlilərimiz isə hələlik fərdi şəkildə məşq edir və onlar bu turda da oynaya bilməyəcək.
– Berti Foqts Estoniya ilə yoldaşlıq oyunu üçün millinin heyətini açıqlayıb. Heyətdə bir nəfər də olsun AZAL-ın futbolçusu yoxdu…
– Deməli, belə məsləhət olub. Mən hesab edirəm ki, Berti Foqts qərarlarında sərbəstdi. Burada qeyri-adi bir şey yoxdu.
– AZAL-ı ardıcıl olaraq "Qarabağ", "Qəbələ" və "Xəzər Lənkəran"la çətin sınaq gözləyir. Komanda buna hazırdı?
– Nə qədər güclü olduğumuzu elə bu oyunlarda sübut etməli olacağıq. Düzdü, bizi çətin oyunlar gözləyir. Bunu uşaqlara da demişəm. Daxildə problemlərimiz var, amma AZAL-da komanda ruhunun yaşadığını bu oyunlarda göstərəcəyik.
– Millinin Estoniya və Qırğızıstanla yoldaşlıq oyununu necə dəyərləndirirsiz?
– Heyət və oyun modeli eynidi. Son nəticələri nəzərə alsaq, komanda yaxşı nəticələr göstərib. İnşallah yaxşı nəticə əldə edib reytinqdə də irəliləyəcəyik. Yalnız uğurlar arzulayıram.
RÖVŞƏN ƏHLİMANOĞLU