Donetskin “Şaxtyor” klubunun sahibi Rinat Axmetov tarixin ən bahalı mənzilini alıb.
“The Business Times”ın verdiyi məlumata görə, iş adamı Monakonun ən nüfuzlu yeni yaşayış kompleksi olan “Le Renzo”da 471 milyon avroya lüks mənzilə sahib çıxıb. Bu, tarixdə ən bahalı yaşayış əmlakı satışı olub.
Əmlak, 2024-cü ildə Şahzadə II Albert tərəfindən açılışı edilən və dəniz kənarında yerləşən Mareterra rayonundadır.
Axmetov tərəfindən alınan əmlak, Aralıq dənizinə baxan eyvanlar və terraslar daxil olmaqla, təxminən 2500 kvadrat metr sahəni əhatə edir. Mənzildə 21 otaq, şəxsi hovuz, jakuzi və ən azı səkkiz dayanacaq yeri var.
Əmlakın alınması Ukrayna ilə Rusiya arasında münaqişənin başlamasından qısa müddət əvvəl baş verib. Alqı-satqının təfərrüatları Monakonun kadastr qeydlərində yer alıb.
Axmetovun holdinq şirkəti olan “System Capital Management” əmlakın alınmasını təsdiqləyib, lakin açıqlamalar verməkdən imtina edib.
Axmetov Ukraynanın ən varlı adamıdır. “Bloomberg”ə görə onun xalis sərvəti 7 milyard dollardan çoxdur.
