Ölkə futbolu
Abanq “Keşlə”dən pula görə ayrılır – Avropaya gedir
“Keşlə”dən göndərilən kamerunlu forvard Anatole Abanq ayrılıqdan danışıb. Futbolinfo.az-a açıqlama verən futbolçu maliyyə məsələlərinə görə klubla razılıq əldə etmədiyini bildirib.
25 yaşlı forvard qeyd edib ki, klub prezidenti ilə görüşsə də, sonradan maaşının yüksəldilməsini istədiyinə görə komandadan göndərilib:
“Səbail”lə oyundan əvvəl klub prezidenti Zaur Axundovla görüşdüm. O bildirdi ki, komandada qalmağımı istəyir. Eynilə menecer və baş məşqçi Sənan Qurbanov bu sözləri demişdi. Yeni müqavilə məsələsinə gəlincə, mən maaşımın artırılmasını istədim. Çünki klubda qalmağımı istəyirlərsə, daha yüksək məbləğ təklif olunmalı idi. Amma sonradan klub bununla razılaşmadı. Mən də başqa təklifləri dəyərləndirmək haqqında düşünməyə başladım. “Səbail”lə matçdan sonra isə daha klub prezidenti ilə görüşmədim. Elə mətbuat konfransından sonra eşitdim ki, yollar ayrılır. İndi də “Keşlə” əvvəlkindən yüksək maaş təklif etsə, mən orda oynamağa hazıram”.
Abanq Avropadan təkliflər aldığını bildirib: “Avropadan təkliflər almışam. Bir neçə klubla danışıq gedir və məsələlərin həll edilməsini gözləyirəm. Həmin klublar mənə daha yüksək maaş təklif ediblər. Ona görə də yəqin ki, bu klublardan birinə gedəcəm. Azərbaycandan heç bir təklif yoxdur. Hazırda sadəcə xarici klublarla danışıram”.