Müsahibə
Abbasov fasilədən və meydançalardan gileylənir: “Cavanlığımızın qədrini bilmədik”
II Liqada çıxış edən “Kür-Araz” komandasının təcrübəli futbolçusu Ramazan Abbasovun futbolinfo.az saytına müsahibəsi
– II Liqanın ilk yarısını 8-ci pillədə bitirdiniz. Bu nəticə sizi qane edirmi?
– Tutduğumuz mövqe komandanın ilk yarıda sərgilədiyi oyuna heç də uyğun gəlmir. Bu mənada nəticə bizi qane edə bilməz. İnşallah, ikinci dövrədə daha yaxşı nəticələr qazanacağıq. Mən buna inanıram.
– Qış fasiləsinə yuxarı pillələrdə yollanmağınıza nə mane oldu?
– Elə oyunlar oldu ki, hesabda önə keçdiyimiz halda, yekunda məğlub olduq. Bundan əlavə, qalib gələ biləyəcəyimiz bəzi matçlarda heç-heçə ilə kifayətləndik. Çox vacib xallar itirdik. Ancaq bütün bunlar yeni yığılmış komanda üçün normal sayıla bilər. İkinci dövrəyə daha yaxşı hazırlaşacağıq.
– Çempionatın ikinci yarısında hədəf nə olacaq? Mövsümü hansı pillədə bitirmək şansınız var?
– Komanda çempionata başlayanda qarşısına yuxarı pillələrdə qərarlaşmağı məqsəd qoymuşdu. Çempionatın ilk yarısında komandalar bir-birlərini tanımırdılar. Oyunlar keçirdikdən sonra hər kəsin gücünə bələd olduq. Qışaqədərki hissədə buraxdığımız səhvləri düzəldərək, mövsümün ikinci hissəsində daha yaxşı nəticələr qazanmağa çalışacağıq.
– Çempionatın ilk yarısında “Kür-Araz”ın heyətində özünü yaxşı tərəfdən göstərən futbolçulardan biri siz oldunuz. Qollar vurdunuz, qol ötürmələri verdiniz. Karyerasını bitirdikdən sonra uzun müddət böyük futboldan uzaq qalan biri olaraq, qayıdışınızı, öz çıxışınızı necə dəyərləndirirsiniz?
– 5-6 il idi ki, böyük futboldan uzaqlaşmışdım. Özümü yenidən sınamaq istədim. Bəzi matçlarda oyunum istədiyim kimi alındı, bəzilərində alınmadı. Çıxışımı orta səviyyədə qiymətləndirmək olar. Yaş da öz sözünü deyir. Cavanlığımızın qədrini bilmədik.
– Mövsümün ikinci yarısı martda start götürəcək. Qış fasiləsinin bu qədər uzun çəkməsi sizə necə təsir edəcək? 2 ay yarımlıq fasilə futbolçuları ritmdən salmayacaq?
– Əlbəttə, çempionatda bu qədər fasilənin olması yaxşı hal deyil. Maksimum 1 aylıq fasilə daha məqsədəuyğun olardı. Amma belə məsləhət biliblər. Bizə düşən fasilənin uzun çəkməsinə rəğmən, ikinci dövrəyə yaxşı hazırlaşmaqdır.
– II Liqada sizi narazı salan başqa hansı məqamlar var? Hansı ki, onların aradan qaldırılmasını, düzəlməsini istərdiniz?
– Ən narazı qaldığımız məqam meydançalardır. Süni örtüklərin içində təkcə “Cəbrayıl”la oynadığımız Neftçi Futbol Mərkəzinin meydançası yaxşı vəziyyətdədir. Digər süni örtüklü meydançalar isə oynanılası durumda deyillər. Çox bərkdirlər, elə bil betonun üstünə səriblər, amartizasiya sistemi ümumiyyətlə yoxdur. Elə meydançalarda mübarizə aparmaq çətin və təhlükəlidir. Çünki futbolçular hər an zədə ala bilərlər. Şəmkirdəki stadion təbii örtüklü olsa da, bərbad haldadır. Eyni sözləri Şəki stadionuna da aid etmək olar. Əsas çatışmazlıq meydançalarla bağlıdır.
– Sizcə, 18 xal geri qaldığınz lider “Baku Sportinq”ə çempionluq mübarizəsində kimsə mane ola biləcək? Yoxsa bu komandanın çempion olaraq I Liqaya yüksələcəyini indidən əminliklə söyləmək olar?
– “Baku Sportinq” ilk yarını yaxşı nəticə ilə tamamladı. Çempionata daha yaxşı hazırlaşdıqları üçün hazırda birinci pillədə yer alıblar. Futboldur, hər cür nəticə qeydə alına bilər. İkinci dövrə hər şeyi göstərəcək. Hamı çalışır ki, yuxarı pillələrdə qərarlaşsın. Kimin mövsümü hansı yerdə başa çatdıracağını zaman göstərəcək.
ABBAS