Abramidzedən Lənkərana salam var: “Bizim vaxtımızda yaxşı komandaların sayı daha çox idi”

Azərbaycanda “Neftçi”, “Xəzər Lənkəran” və “İnter” klublarının formasını geyinmiş, Gürcüstan yığmasının sabiq müdafiəçisi Valeri Abramidzenin futbolinfo.az saytına müsahibəsi

– Hazırda hansı işlə məşğulsunuz? Məşqçi kimi fəaliyyət göstərirsiniz?

– Keçən il “Rustavi” klubunda məşqçi kimi çalışırdım. Hazırda isə işsizəm.

– Ölkəmizdə “Neftçi”, “Xəzər Lənkəran” və “İnter”in formasını geyinmisiniz. Bu klublardan hansında karyeranız daha yaxşı alınıb?

– Ümumilikdə Azərbaycandakı karyeramdan razıyam. Hansısa klubu fərqləndirə bilmərəm, çünki hər birində əlimdən gələni etmişəm, uğurlar qazanmışam. “Neftçi” və “Xəzər Lənkəran”la ölkə çempionu olmuşam, “İnter”lə Birlik Kubokunda birincilik əldə etmişəm. Bir sözlə, hər 3 komandadakı çıxışım uğurlu alınıb. Bundan isə yalnız razı qala bilərəm.

– Azərbaycanda birgə oynadığınız yerli futbolçulardan kimləri fərqləndirərdiniz?

– Azərbaycanda bir çox yerli oyunçu ilə komanda yoldaşı olmuşam. Rəşad Sadıqov, Qurban Qurbanov və Mahmud Qurbanovu fərqləndirə bilərəm. Hər üçü yüksək səviyyəli futbolçular idi. Hə, bir də Zaur Tağızanın adını mütləq çəkməliyəm. Onu unutmaq olmaz. Zaur birgə oynadığım azərbaycanlı futbolçular arasında ən yaxşılardan idi.

– Bəs, ölkəmizdə birgə çıxış etdiyiniz hansı legionerlər öz oyunu ilə daha çox yadınızda qalıb?

– Georgi Adamiya, Branimir Subaşiç, Aleksandr Çertoqanovun adını çəkə bilərəm. Daha bir neçə səviyyəli legionerlə bir yerdə oynamışam. Sadəcə, indi hamısını xatırlaya bilmirəm, məndən inciməsinlər. Onu deyim ki, həmin dönəmdə Azərbaycana çoxlu yüksək səviyyəli legioner gəlmişdi.

– Azərbaycan çempionatında bir çox hücumçuya qarşı oynamısınız. Onlardan kimi ən güclü forvard sayırdınız və ona qarşı oynamaq sizin üçün asan olmurdu?

– Əminliklə bir nəfərin adını çəkərdim. Digər hücumçularla müqayisədə Adamiyaya qarşı oynamaq daha çətin idi.

– Azərbaycan futbolunu yəqin ki, izləyirsiniz. Ölkəmizdə oynadığınız dövrlə müqayisədə futbolumuzda hansı dəyişikliklər baş verib?

– Azərbaycanda klub futbolunun səviyyəsi qalxıb. Bunu “Qarabağ”ın hər il avrokubokların qrup mərhələsində çıxışı təsdiqləyir. Ancaq bizim vaxtımızda yaxşı komandaların sayı daha çox idi, azarkeşlər çempionatda gərgin rəqabətin şahidi olurdular. “Bakı”, “Xəzər Lənkəran”, “İnter”, “Neftçi”, “Qarabağ” – bunların hamısı birinci yer uğrunda mübarizə aparırdı. İndi isə çempionluğa ən real namizəd qismində ancaq “Qarabağ”ın adını çəkmək olar. O dönəmdə bir komandanın hegemonluğu yox idi.

– Sabiq komandanız “Neftçi”nin hazırkı durumu haqda nə deyə bilərsiniz? Qarşısına çempionluq hədəfi qoyan flaqmanın bu uğura imza atacağını gözləyirsiniz?

– “Neftçi” Azərbaycan futbolunun flaqmanıdır. Bu komanda həmişə çempionluq uğrunda mübarizə aparmalıdır. Ancaq “Neftçi”də tez-tez məşqçi, rəhbər dəyişiklikləri baş verir. Bu səbəblərdən komanda sabit oyununu tapa bilmir. Yayda baş məşqçi postuna Adrian Mutunu gətirdilər. Mutunun məşqçi kimi nəyə qadir olduğunu bilmirəm. Amma futbolçu kimi o, dünya ulduzlarından olub. Ümid edirəm ki, Mutu komandada balans yarada biləcək və rəqabətcil heyət formalaşdıracaq. Bunu edə bilsə, Azərbaycan futboluna da xeyir verəcək. Çünki “Neftçi”nin güclənməsi çempionatın daha maraqlı keçməsinə səbəb olacaq.

– Digər keçmiş komandanız “Xəzər Lənkəran” isə artıq neçə illərdir fəaliyyət göstərmir. Yəqin ki, bu, sizi də məyus edir…

– “Xəzər Lənkəran”a görə təbii ki, üzülürəm. O cür klubun fəaliyyətini dayandırması adama pis təsir edir. Yaxşı xatırlayıram, “Xəzər Lənkəran”ın möhtəşəm azarkeş dəstəyi var idi. Lənkəranda o cür fanat ordusunun önündə meydana çıxanda sevinirdim. Tribunalar bütün oyunlarda dolu olurdu. Fürsətdən istifadə edib məni xatırlayan, həmçinin xatırlamayan lənkəranlı azarkeşlərə salam göndərirəm. Ümid edirəm ki, tez bir zamanda “Xəzər Lənkəran” fəaliyyətini bərpa edəcək və yenidən azarkeşlərini sevindirəcək.

– Azərbaycanda başınıza gələn hər hansı bir maraqlı hadisəni danışa bilərsiniz?

– Açığı, gözlənilməz sual oldu və tez bir zamanda hansısa hadisəni xatırlaya bilmirəm. Ümumilikdə onu deyə bilərəm ki, Azərbaycana gəldiyim ilk gündən ölkəniz haqda pozitiv düşüncədə olmuşam. İndinin özündə də ancaq xoş xatirələr yadıma düşür. Azərbaycanda yaxşı dostlar, tanışlar qazandım. Oradakı karyeramı bitirdikdən sonra ölkənizə tez-tez gələ bilməsəm də, bir neçə dəfə səfər etmək imkanım olub. Bakını çox bəyənirəm. Məni tanıyan hər kəsə salam göndərirəm.

– Təklif alsanız, Azərbaycanda məşqçi kimi fəaliyyət göstərmək istərsiniz?

– Əlbəttə. Belə bir təklif olsa, məmnuniyyətlə Azərbaycana gələrəm.

FƏRİD