AFFA-da “müharibə başladı” – klublar Paris ssenarisinə qarşı

AFFA-da daxili müharibə başlayıb. Klublara dövlətdən ayrılan maliyyənin legionerlərə xərclənməməsi barədə qadağa bunun təzahürüdür.

Bildiyiniz kimi, dövlət AFFA vasitəsi ilə hər bir Premyer Liqa klubuna 3 milyon manat ayırır. Bu məbləğin 1 milyonu uşaq futboluna, 2 milyonu isə əsas komandaya xərclənir. İndi isə AFFA həmin pulun da yalnız yerli futbolçulara verilməsini, legionerlərin sponsorlardan gələn maliyyə ilə transfer edilməsini istəyir. Görünür, məsələ o qədər ciddidir ki, dünən Klublar Komitəsi təcili yığışdı və İK-ya rəsmi müraciət ünvanlayıb etiraz etdilər.

“Şamaxı”nın az öncə yaydığı bəyanat da elə buna hesablanıb. Bölgə klubu daxil olduğu “xətt”in ideyasını dəstəkləmək üçün guya ki, bu variantın faydalı olduğunu göstərməyə çalışır. Halbuki belə olmadığını hamımız bilirik.

Əldə etdiyimiz məlumata görə, bu təklif birbaşa İcraiyyə Komitəsindən gəlib. Daha doğrusu, Parisdə əyləşib Azərbaycan futbolunu çömçələməyə davam edən vitse-prezident Elxan Məmmədovun ideyasıdır. Klubları əldə saxlamağa, bir az da zəiflətməyə, oyuncağa çevirməyə çalışan bu şəxs növbəti uğursuz layihəsini tətbiq etməyə çalışır. AFFA prezidenti Rövnəq Abdullayev və onların sözü ilə oturub-duran İK üzvləri də bu variantın təsdiqlənməsinə, “Elxan FİFA”-nın ssenarisinin tətbiqinə çalışır.

Amma müstəqil klublar təklifə dərhal sərt reaksiya verib, haqlı olaraq klubların müstəqilliyinə xələl gətirəcək ideyaya qarşı çıxıblar. İcraiyyə Komitəsinin bugünkü iclasında onların etirazı qurum üzvlərinin nəzərinə çatdırılıb.

Proseslərin davamı çox maraqlı olacaq. Futbol təsərrüfatında bölünmələr daha aşkar hiss olunur. Qarşıdakı aylar ya Elxan Məmmədovun məhv etdiyi Azərbaycan futbolunun xarabalıqları üstündə əbədi hakimiyyətini bərqərar edəcək, ya da onun Fransa paytaxtından uzanan əli birdəfəlik kəsiləcək.

VÜSAL MAHMUDOV