Ölkə futbolu
AFFA-nın həvəskar biabırçılığı: diviziona yeni saxtakarlar gəlir
Həvəskar düşüncənin, qeyri-peşəkar təşkilatcılığın, səriştəsizlərin qurduğu düzənin nəticəsi budur. AFFA bütün layihələrində olduğu kimi, Region Liqasında qüsursuz iş görməyi bacarmadı.
Dünən bəlli oldu ki, Region Liqasında finala yüksələn “Araz Naxçıvan” bunu saxtakarlıqla reallaşdırıb. Belə ki, komanda “Xan Lənkəran”la yarımfinal matçına oynamasına icazə olmayan peşəkar futbolçularla çıxıb.
Yox, bu, yalnız bir klubun ayıbı deyil. Əsas məsuliyyət yarışı təşkil edənlərin boynundadı. Bəlkə də lənkəranlılar ayıq olmasaydı, rəqibin saxtakarlığını üzə çıxarmasaydı, muxtar respublika təmsilçisinin etdiklərindən kimsə xəbərdar olmayacaqdı. Bu komandanın yarımfinala kimi ifşa edilməməsi də bunu deməyə əsas verir. Deməli, “Xan Lənkəran” bəyanat” yayıb Əsasnaməni ayaqlayanları üzə çıxarmasaydı, bu komanda finalda oynayacaq, bəlkə qalib olacaqdı.
İndi maraqlıdı: Naxçıvan regionunda “Araz”la mübarizədə uduzmuş komandalar etiraza başlasa, nəticələrin ləğv olunmasını istəsə, nə olacaq? Axı, bu komanda saxtakarlıqla kimlərinsə haqqını yeyərək bura kimi irəliləyib. Və yarışın Əsasnaməsində də saxtakarlıq halı aşkarlandığı halda komandanın bütün nəticələrinin ləğv edilməsi, məşqçisinin uzun müddətə dizskvalifikasiya olunması nəzərdə tutulub. AFFA İntizam Komitəsi müddəaları niyə tam şəkildə tətbiq etmir?
Təfərrüat ondan ibarətdir ki, Region Liqasının yarımfinal mərhələsinin “Xan Lənkəran” – “Araz Naxçıvan” oyununun nəticəsi ləğv edilib. Buna səbəb Naxçıvan klubunun meydana peşəkar futbolçular buraxması olub. Belə ki, Orxan Əliyev və Elməddin Məmmədov lənkəranlılarla qarşılaşmada iştirak edib. Bu üzdən komitə rəqibini 2:1 hesabı ilə məğlub edərək finala adlayan “Araz Naxçıvan”a texniki məğlubiyyət (0:3) verib. Bu da o deməkdir ki, finalda “Cəbrayıl”ın rəqibi “Xan Lənkəran” olacaq. Həmin görüş mayın 20-də keçiriləcək.
Maraqlidi, bəs, matçdan öncə komandaların heyəti yoxlanılmırmı, iştirak ərizəsinə baxılmırmı? Axı, sözügedən futbolçuların, ümumiyyətlə, meydana çıxması qəbahətdi və qurum buna icazə verməməliydi. Deməli, yarışı keçirən AFFA səriştəsizlərin toplaşdığı bir qurumdu. Assosiasiya həvəskarlar arasında adi bir yarışda belə biabırçı olaya imkan verirsə, gerisini düşünməyə gərək yoxdu.
Ən pisi odur ki, AFFA yeni mövsümdən I divizionda “Xan Lənkəran”ın yox, məhz “Araz Naxçıvan”ın oynamasına, saxtakar kluba maliyyə ayırılmasına qərar verib. Bu, həmin klubdur ki, illər öncə Premyer Liqadan yarımçıq qaçmış, AFFA-nı çıxılmaz vəziyyətdə qoymuşdu. Ümid edirik, qurum azarkeşləri ilə futbola rəng qatan, lazım gələndə haqqını tələb etməyi bacaran, təmiz futbol oynayan “Xan Lənkəran”ın yox, “Araz Naxçıvan”ın diviziona buraxılmasına peşman olmayacaq.
Təbii ki, Naxçıvana da futbol yaraşır, amma təmiz futbol. Klub hələ də son qərara münasibətini bildirməyib, muxtar respublikanın idman imicini ayaq altına atan şəxslərlə bağlı veriləcək cəzanı açıqlamayıb. Gözləyirik…
FƏRİD
P.S.: AFFA-nın baş katibi Sərxan Hacıyev ilk qolu buraxdı. Bəh-bəhlə məsul posta əyləşən bu şəxsin səriştəsi heç həvəskar futbola da uyğun deyilmiş.
- I Liqa2024-05-17 08:00
“Şamaxı”… Qayıdır axı…
- Premyer-liqa2024-05-17 22:21
“Qarabağ” “Turan Tovuz”a qalib gəldi
- Ölkə futbolu2024-05-17 11:12
Vaqner Silva: “Avropada “Qarabağ”dan qorxurlar”
- Müsahibə2024-05-16 14:00
“Niderlandda gördüklərimizi həm akademiyamızda, həm də əsas komandamızda tətbiq etməyə çalışacağıq”