Ölkə futbolu
AFFA-nın növbəti saxtakarlığı: Əsasnaməni pozdular
AFFA, PFL və 8 Premyer Liqa klubunun əməkdaşlarından ibarət komandaların iştirakı ilə təşkil olunan “Zəfər Kuboku” turnirinə start verilib. Bakı Olimpiya Stadionunun ərazisində yerləşən “Sportster Arena”da keçirilmiş oyunların nəticələri belədi:
İlkin oyunlar
“Sumqayıt” – “Sabah” 3:0
“Neftçi” – “Səbail” 0:0, penaltilərlə 3:5
1/4 final
PFL – AFFA 2:5
“Qarabağ” – “Sumqayıt” 3:5
“Keşlə” – “Qəbələ” 4:3
“Zirə” – “Səbail” 2:5
Yarışda yarımfinal və final oyunları bu gün baş tutacaq. Həlledici matça çıxmaq üçün AFFA “Sumqayıt”la, “Keşlə” “Səbail”lə üz-üzə gələcək.
Maraqlıdı ki, elə yarışın ilk günündə qalmaqal yaşanıb. 44 günlük Vətən müharibəsində qələbənin ildönümü münasibətlə baş tutan yarışda məhz AFFA-nın komandası qanunsuzluğa əl atıb. Belə ki, yarışın Əsasnaməsində veteranların yaşına qoyulan limit pozulub. Komandalara yaşı 40-dan çox olan 2+1 (qapıçı) veteranla güclənmək imkanı tanınıb, amma assosiasiyanın təmsilçisi heyətini sabiq futbolçularla doldurub. Onlardan ikisinin yaşı isə hətta hələ də Premyer Liqada oynamağa imkan verir. Belə ki, İlqar Qurbanov (25 aprel 1986) və Vüqar Nadirov (15 iyun 1987) yaşları 40-ı haqlamasa da, turnirdə iştirak edir.
Yarışın önəmi bir yana, AFFA-nın öz Əsasnaməsinə hörmət qoymaması təəssüf doğurur. Yalançı uğur naminə hətta sıradan turnirdə saxtakarlığa atan bu insanlardan hələ də ölkə futbolunda ədalətli rəqabət yaratmağı gözləyənlər var.