Milli komanda
AFFA-nın ürəyi Ukrayna millisi üçün döyünən “tapıntı”sı
Bəzən insanın bir sözü, kəlməsi onun xarakterini açmağa, potensialını qiymətləndirməyə imkan verir. Elə onun düşüncələrini, niyyətini duymaq üçün də kiçik açıqlaması kifayət edir.
Doğrusu, AFFA-nın milli komandamıza cəlb etməyə hazırlaşdığı futbolçularla bağlı nikbinliyimiz yoxdu. Kamran Əliyev “Ximki”də heyətə düşməyə-düşməyə qiymət oxuyur, “Minay”da cəmi 6 matça çıxmış Rüstəm Əhmədzadənin səviyyəsi isə minimal tələblərə cavab vermir. Yalnız Anatoli Nuriyevdən qismən ümidli idik, o da açıqlaması ilə özü haqda təəssürat formalaşdırdı.
Öz ölkəsinin millisinə düşmək şansı olmadığından Azərbaycan yığmasını seçən onlarla futbolçu görmüşük. Və onlardan heç biri komandamızı gücləndirməyib. Belələri yalnız yaxşı pul qazanıb, sıradan oyunçu olublar, özümüzkülərdən fərqlənməyiblər. Anatoli də belələrindən olacaq – o, özünü açıqlaması ilə ifşa edib.
25 yaşlı hücumçu Ukrayna mətbuatına açıqlamasında deyib: “Özümü beynəlxalq səviyyədə sınamağı çox istəyirəm. Azərbaycan millisində oynaya biləcəyimlə bağlı söhbətlər ilk dəfə bir il öncə başladı. Axı, ata tərəfdən bu ölkə ilə bağlılığım var. Hazırda bu işlə AFFA məşğul olur. Hər zaman Ukrayna millisində oynamaqla bağlı arzum olub. Lakin orada çox yüksək rəqabət var. Ölkənin əsas komandasında debüt etmək bir yana, yığmaya çağırılmağım belə gözlənilmir”.
Nuriyevin dediyindən aydın olur ki, onun ürəyi Ukrayna millisindədi, sadəcə, səviyyəsi buna yetmir, hətta dəvətə ümid bəsləmir. Azərbaycanı da sevdiyindən yox, məhz başqa variantı olmadığından seçib. Deməli, bu futbolçu hər hansı xüsusi bacarıq sahibi deyil, karyerasını inkişaf etdirmək, özünü beynəlxalq arenada sınamaq üçün ölkəmizə can atır.
Anatoli yerli futbolçulardan üstün deyilsə, onu gətirib kiminsə yerini tutması nəyə lazımdı? Milliyə xaricdən legioner gətirəcəyiksə, illərdi bütün yaş qrupları üzrə yarışları niyə keçiririk? Bu qədər vəsait xərclənir, əvəzində milliyə namizədlər yetişdirə bilmiriksə, boşluğu hər sıradan oyunçuylamı doldurmalıyıq? Bəlkə futbolçu dilənməkdənsə, işləri sahmana salaq, uşaq futbolunda düzgün sistem, struktur quraq, öz istedadlarımızı yetişdirək?
AFFA-nın nə qərar verəcəyini bilmirəm, amma məncə, Nuriyev millimizi azacıq da olsa, gücləndirməyəcək. Vaxtımızı eksperimentlərə həsr etməyək. Ziyanın yarısından qayıtmaq da xeyirdi.
CAVAD
P.S.: Bir düşünün, atası azərbaycanlı olan birinin adı niyə Əhməd, Məmməd, Əli, Vəli yox, məhz Anatoli olsun? Azərbaycana sevgidənmi?