Müsahibə
Aftandil Hacıyev: “Kəpəz” və “Qəbələ” də avrokuboka vəsiqə qazana bilər”
Azərbaycan yığmasının keçmiş müdafiəçisi, “Qarabağ”ın Futbol Akademiyasının koordinatoru Aftandil Hacıyevin futbolinfo.az saytına müsahibəsi
– Çempionatın ilk yarısı geridə qaldı. 18 tura əsasən Premyer Liqanın ümumi mənzərəsi haqda nə deyə bilərsiniz? Bu mövsüm əvvəlkilərdən nə ilə fərqlənir?
– Əvvəlki illərə nisbətən bu mövsüm komandaların imkanları daha da yüksəlib. Əvvəllər 2-3 komandanın büdcəsi kifayət qədər aşağı idisə, hazırda yalnız “Kəpəz” bu vəziyyətdədir. Digərlərinin büdcəsi isə aşağı-yuxarı eyni səviyyədədir. Bunu turnir cədvəlində də görmək mümkündür. Komandalar bir-birlərinə yaxın sayda xallar toplayıblar. Hər bir komandanın bir-birini məğlub etmək imkanı yüksəkdir. “Qarabağ”dan savayı, digər komandalar bu minvalla çempionatın sonuna kimi öz aralarında mübarizə aparacaqlar. Böyük xal fərqi olmayacaq. Hər bir komandanın Konfrans Liqasına vəsiqə qazanmaq şansı qalmaqdadır. Buraya hətta “Kəpəz” və “Qəbələ”ni də aid etmək olar.
– “Qarabağ” qış fasiləsinə ən yaxın izləyicisindən 12 xal öndə yollandı. İndidən Ağdam klubunun bu mövsümü də çempion kimi bitirəcəyini əminliklə demək olar?
– İlk dövrə ilə müqayisədə ikinci dövrə “Qarabağ” üçün daha faydalı keçdi. İlk dövrədəki xal itkilərinin səbəbi avrokuboklarda sıx qrafikdə keçirilən oyunlar idi. Qurban Qurbanov tez-tez rotasiyalara əl atmalı olurdu. İlk dövrədə itirdikləri xalları ikinci dövrədə artıqlaması ilə kompensasiya etdilər. Əlbəttə ki, çempionluğa ən real namizəd “Qarabağ”dır. Çempionluq rəqabətində Ağdam klubuna kiminsə yaxınlaşa biləcəyini düşünmürəm.
– Avropa Liqasında “Braqa” ilə oyunlarda “Qarabağ”ın şansını necə görürsünüz?
– Bu gün rəqib daha reytinqli, daha təcrübəli komandadır. Amma “Qarabağ”ın da özünəməxsus oyun üslubu var. Bundan əlavə, Ağdam klubu kifayət qədər təcrübəyə sahibdir. Düşünürəm ki, bu dueldə hər iki tərəfin şansları bərabərdir. Hazırda transfer dönəmini yaşayırıq. Yeni gələn və ya gələcək futbolçulardan da çox şey asılı olacaq.
– 2023-cü ildə sizin üçün Azərbaycanda ən vacib futbol hadisəsi hansı oldu?
– İlin ən vacib, hər birimiz üçün yaddaqalan hadisəsi 30 ildən sonra Xankəndidə möhtəşəm futbol matçının keçirilməsi oldu. Ölkə başçısı da bu görüşü stadiondan izlədi. Oyunu canlı izləyən hər bir kəs xoş hisslər yaşadı. Xalqımızı bu cür qələbə ruhunda görmək hamımızı sevindirdi. İnanırıq ki, bundan sonra bölgələrimizdə də futbolun inkişafı sürətlənəcək. Təbii ki, “Qarabağ”ın Avropa Liqasında qrupdan çıxmasını, pley-off mərhələsinə adlamasını da unutmaq olmaz. Bu da ilin qeyd olunmalı futbol hadisələrindəndir.
– Ötən mövsümün ən yaxşı yerli futbolçusu qismində kimin adını çəkə bilərsiniz?
– Suala cavab olaraq, bir çox futbolçunun adını çəkmək olar. Namizədlərin hər biri buna layiqdir. Amma mənim düşüncəmə görə, Bəhlul Mustafazadə həm millidə, həm də klubunda çox yaxşı il keçirdi. İlk növbədə Bəhlulun adını çəkərdim. Emin Mahmudov, Elvin Cəfərquliyev, Toral Bayramov və digər namizədlər də ili yüksək səviyyədə keçirməyi bacardılar.
– Sizə görə, ötən il Azərbaycana gələn ən uğurlu əcnəbi transfer kim oldu?
– İlin əcnəbi transferi kimi Julio Romaonu qeyd edərdim. Bu futbolçu gözləntilərimdən də üst səviyyədə performans göstərdi. Zənnimcə, ən yaxşı transfer kimi Romaonun adını çəkmək olar.
– 2024-cü ildə Azərbaycan futbolundan əsas gözləntiləriniz nələrdir?
– 2024-cü ildə futbolumuzun daha da irəli getməsini, klubların akademiyalarına lazımi qədər diqqət ayırmalarını, milli komandaların nəticələrinin daha da yaxşılaşmasını, digər klublarımızın da “Qarabağ” kimi avrokuboklarda uğurlu çıxışını, çempionatımızda komanda sayının artırılmasını və bölgələrdə futbolun inkişafını görmək xoş olardı.
FƏRİD