Ölkə futbolu
“Ağ-qaralı” komandanın ağ zolağa bürünmək zamanı – azarkeşlər də inansın!
“Neftçi” Kiprdə çox səhvlər etdi. Hətta bəzi epizodlarda hakimlərin bakılılara qarşı etdiyi kiçik qüsurlar belə gümüş medalçımızın səhvlərini unutdura, bəhanə ola bilməz.
Təmsilçimizin 0:2 hesablı məğlubiyyəti ilə bitən matç səhvlər zənciri ilə hörülmüşdü. Buraxılan qollarda ciddi səhvlər buraxan Mamadu Mbodj problemin görünən üzüydü. Onu sağ cinah müdafiəçisi kimi oynadan məşqçi, bu mövqeyə səviyyəli futbolçu almayan rəhbərlik daha böyük günah sahibiydi.
Elə meydanda olanlar da unudulmamalıdı. Mamaduya cinahında dəstək verməyən yarımmüdafiəçi, həmkarını sığortalamayan mərkəz müdafiəçiləri, dayaq bölgəsi oyunçuları, hücumda təzyiq yaratmağı bacarmayan hücumçu – sadalasan, bütün komandada qüsur tapmaq olar. Təbii ki, bu oyun dəst-xəttini seçən, yanlışları görməyən baş məşqçi məğlubiyyətin əsas səbəbkarıdı.
Amma indi bu qeydləri yadda saxlamaq, cavab matçına köklənmək lazımdı. Yanlışlıqlar düzəldilməsə, o zaman “Neftçi” daha böyük tənqidi haqq etmiş olacaq. Hələliksə bakılılara dəstək, komandanın cavab oyununa daha yaxşı hazırlaşması üçün motivasiya vermək lazımdı. 0:2 pis, amma revanşının alınması mümkün olan nəticədi. Düzgün hazırlaşmaq, vəziyyəti dəyişmək gərəkdi.
Rəqib də dişimizə görədi, avrokubokların debütantı “Aris” ilk görüşdə daha güclü olduğu üçün yox, “Neftçi” öz səhvləri içində itib-batdığı üçün qalib gəldi. Və hətta Azərbaycan çemponatında ilk “dördlüy”ə düşmək potensialı olmayan bu komandanı Bakıda darmadağın etmək şərtdi.
“Neftçi” də bunun fərqindədi, cavab matçına ciddi hazırlaşır. Komandaya 12-ci oyunçu kimi dəstək verməsi lazım olan azarkeşlərin dünən etdikləri isə vəziyyəti dəyişməyin mümkünlüyünə hamının inanmasının nümunəsi idi. Fanatlar komandanı məşqdə də yalnız qoymayaraq dəstəyini göstərirsə, deməli, oyun günü tribunalar dolu olacaq və ümumi qələbə üçün qüvvələr birləşəcək.
“Neftçi”nin tapşırığı bəllidi – mümkün qədər erkən qol vurmaq, müdafiəni unutmamaq şərti ilə hücumları sıralamaq. Hesab nə qədər erkən açılsa, oyunun qalan dəqiqələri bir o qədər rahat keçəcək. Kiprlilərin ilk oyunun ikinci hissəsində qısa müddətdə vurduğu 2 qolun əvəzini çıxmaq, daha artığını etmək üçün bakılıların ixtiyarında bütöv 90 dəqiqə var. Hətta oyunu əlavə vaxta daşımaq, həlledici zərbəni həmin zamanda vurmaq da olar. Yetər ki, azarkeşlərdən müdhiş dəstək alacaq “Neftçi” özünə yaraşan futbolu oynasın.
İlk matçın istənilən səviyyədə alınmamasında yeni yığılan heyətin adaptasiya dövrünü başa vurmaması, məşqçinin oyunçuları tanımaq, onları öz dəst-xəttinə uyğunlaşdırmaq üçün zamanın az olması da rol oynamışdı. Ötən bir həftənin bu baxımdan müsbət təsiri olacağını düşünürük.
Heç nə itirilməyib, heç nə bitməyib. İnanmaq, güvənmək, yumruq olmaq və həmin yumruqla rəqibi nokauta salmaq zamanıdı. “Ağ-qaralı” komandanın qara gününü Kiprdə gördük, indi ağ zolağa bürünməyin vaxtıdı. Əks halda, sıradan bir rəqibi yenə bilməməyin təəssüfüylə sıralanacaq tənqidlər heç nəyi dəyişməyəcək.
ŞAHSUVAR