Amin Seydiyev: “Sona kimi mübarizə aparacağıq”

“Sabah”ın müdafiəçisi Amin Seydiyevin futbolinfo.az-a müsahibəsi

• “Sabah” son matçda qələbə qazandı. Necə düşünürsən, komanda bununla uğursuzluğu üstündən ata bildi?
• Bizim üçün çətin oyun oldu. Komanda son dəqiqəyə kimi mübarizə apardı və sonda bizə lazım olan 3 xalı qazanmağı bacardıq. Qələbə qazandığımıza görə şadam. Hər qələbə komandaya bir az da motivasiya verir. Lakin deməzdim ki, bundan öncəki oyunlarımızda zəif çıxış etmişdik. Sadəcə, bir qədər bəxtimiz gətirmirdi. Ancaq artıq bu oyunları unudub, irəliyə, qarşıdakı matçlarımıza köklənmişik.
• Avrokuboklar üçün bundan sonrakı matçlarda xal itirməməyiniz görünən odur ki, vacibdir. Səncə, klub bunu bacaracaq?
• Biz hazırda mövsümün sonunda hansı pillədə olacağımız yox, yalnız hər növbəti oyunumuz barədə düşünürük. Oyunlarımızdan öncə turnir cədvəlindənsə, rəqibimizə köklənməyi üstün tuturuq. Sonda hansı pillədə olacağımızı görəcəyik.
• 4-cü pillə ilə aranızda 8 xal fərq var. Bunu böyük xal fərqi sayırsan, yoxsa aradan qaldırmaq mümkündür?
• Qarşıda hər komandanın 10 oyunu var. Hər şey mümkündür. Proqnoz verə bilmərəm, lakin onu deyə bilərəm ki, sona kimi mübarizə aparacağıq.
• Nəzərə alaq ki, 4-cü pillədəki rəqib “Neftçi”dir. Onların qarşıdakı 10 turda bu qədər xal itirəcəyinə ümid edirsən?
• Bayaq da qeyd etdiyim kimi, biz ancaq öz oyunumuz barədə düşünürük. Rəqiblərlə aramızda olan xal fərqi və ya rəqiblərimizin oyunları barədə düşünməkdənsə, hər növbəti matçımıza köklənir, meydana 3 xal üçün çıxırıq.
• Qarşıda çempionatın lideri “Qarabağ”la qarşılaşacaqsız. Bu matç barədə nə deyə bilərsən?
• Qarşıda bizi çətin oyun gözləyir. Qeyd etdyiniz kimi, “Qarabağ” çempionatın lideridir. Əlimizdən gələni edəcəyik ki, bu matçdan yaxşı nəticə ilə ayrılaq.

FƏRİD