Ölkə futbolu
Andelkoviç: “Daha yaxşısını edəcəyik”
“Keşlə” üzərindəki qələbə bizim üçün vacib idi. Maksimum nəticəyə köklənmişik” – bu sözləri futbolinfo.az-a açıqlamasında “Zirə”nin futbolçusu Nemanya Andelkoviç deyib.
O, Azərbaycan çempionatının 9-cu turunda “Keşlə” üzərində qazandıqları 2:0 hesablı qələbədən danışıb: “Baş məşqçimiz Rəşad Sadıqovun dediklərini tam yerinə yetirmək üçün çalışırıq. Biz bir komanda kimi son dəqiqəyə qədər döyüşdük və qalib gəldik. Sevinirəm ki, oyundan oyuna daha yaxşı oluruq. Həm gözəl futbol oynayırıq, həm də nəticə qazanırıq. Yaxşı nəticələrə davam edəcəyimizə ümid edirik”.
Serbiyalı müdafiəçi Premyer Liqada “Neftçi”yə hər iki matçda məğlub olmalarına toxunub: “Biz iki oyunda uduzmuşuq və hər ikisi “Neftçi” ilə matçlarda olub. Bu barədə bir şeyə deyə bilmərəm. Çünki bu futboldur və pis nəticələri tez unutmaq lazımdır. Növbəti qarşılaşmaya hazırlaşırıq. Biz hər oyuna final kimi baxırıq. “Neftçi” ilə son matçda məğlubiyyətə layiq deyildik. Lakin futbolda belə anlar olur”.
Andelkoviç komandanın uğurlu yolla davam etməli olduğunu bildirib: “Biz əlbəttə ki, bu cür davam etməliyik. Yaxşı oyun, yaxşı nəticə üçün çalışmalıyq. Hər oyunda maksimum güc qoymalıyıq. Şadam ki, futbolçular arasında yaxşı əlaqə var”.
Qış fasiləsinə ilk “3-lük”də yollana bilərsinizmi” sualına futbolçu belə cavab verib: “Ümid edirəm ki, daha yaxşısını edəcəyik. Lakin öncədən danışmaq istəmirəm”.
Nemanya “Sabah”la qarşıdakı matçdan da söz açıb: “Sabah”a qarşı yaxşı oyun olacaq. Çox yaxşı işləyirik və konsentrasiya olmuşuq. Rəqib də son matçda “Qəbələ”ni məğlub edib. Maraqlı və gözəl oyun olacaq”.