Ölkə futbolu
Ardıcıl 3-cü məğlubiyyət “Neftçi”ni “3-lük”dən kənara atdı
Zirəlilər “Səbail” üzərində qələbəni rəsmiləşdirəndə bunun onların həftəni “üçlük”də tamamlamalarına imkan verəcəyini bilmirdilər. Bu gün növbəti oyununu keçirəcək “Qəbələ” öz yerində, “Neftçi”nin turu xalsız başa vurması az ehtimal edilirdi.
İstənilən halda, “Zirə” öz qələbəsini rahatlıqla qazandı. Bayıl təmsilçisi ilə matçda çox əziyyət çəkmədən qollar vuran Rəşad Sadıqovun yetirmələri hazırda 2-ci pillədədi. Onlardan öndə isə yalnız “Qarabağ”dı – maraqlıdı ki, məhz bu iki komanda cari mövsümdə keçirdikləri bütün matçlarda qol vurublar. Bəlkə də elə bu özəlliyinə görə “qartallar” rahat nəfəs almağa başlayıb. Məhsuldarlığa görə bombardilik yarışının önündə gedən Davit Volkov önəmli yer tutur, lakin ümumən komanda yaxşı təsir bağışlayır.
“Səbail”in asan təslim olmasının bir səbəbi də heyət problemləri idi. Cəzalılar, zədəlilər o qədər çox idi ki, Nail Alışov debüt etmək şansı qazanmışdı. İnsafən bu qapıçı 3 top buraxsa da, yaxşı təsir bağışladı, “dənizçilər”in problemi komanda oyununda, digər xətlərdəki çatışmazlıqlarda idi.
Günün ikinci matçı daha dramatik alındı. Heyətdə yenə yersiz rotasiyalara əl atan, sabit “11-lik”dən uzaq olan Samir Abasov həmkarı Murad Musayevin Azərbaycanda ilk qələbəsini qazanması üçün hər şey etdi.
Hesabı oyunda daha üstün olan “Neftçi” açdı. Meydan sahiblərinin qolu gedişata uyğun idi və davamının gəlməsi gözlənilirdi. Lakin “Keşlə” ilə ötən turdakı matç kimi – fasilədən sonra, hər şey dəyişdi. Təşəbbüsə yiyələnən qonaqlar rəqibin müdafiəsində və dayaq bölgəsindəki boşluqları ustalıqla dəyərləndirdi. Aleksey İsayevi dayandırmaq üçün heç nə fikirləşə bilməyən “Neftçi” əks-hücumlarda asanlıqla azlıqda yaxalandı və ardıcıl iki top buraxdı.
Beşli müdafiənin üstünlüyü cinah hücumlarıdısa, “Neftçi”də bu alınmadı, təkqanadla uçmaq isə qəzaya səbəb oldu. Əlinin altında 12 legioner olan Abasov onlardan düzgün faydalanmağın yolunu hələ də öyrənmədiyindən növbəti zərbəni aldı və cəmi üç əcnəbiyə güvənən “Sabah” layiq olduğu qələbəni əldə etdi.
“Sabah”ın haqqını yeməyək, “Neftçi” hər nə qədər bərbad oynadığı üçün uduzsa da, komandanı bu vəziyyətə salan məhz rəqibi idi. Son 4 oyunda 3 qələbə qazanan, uduzmadan 11 qol vuran “Sabah” artıq 5-ci pillədədi, özünəinamı artırsalar, avrokuboklara vəsiqə üçün mübarizəyə davam edəcəklər. Müxtəlif səbəblərdən oynamayan 4 əsas heyət üzvü qayıtdıqdan sonra Murad Musayevin daha yaxşı işlər görmək imkanı olacaq.
“Neftçi” isə böhrandadı. “Qarabağ”, “Keşlə” və “Sabah” – ardıcıl 3 məğlubiyyət, buraxılan 9 qol. Komanda hazırda yalnız “Keşlə”dən az top buraxıb. Çempion komanda üçün bu göstərici utancvericidi. Bakılılar sonuncu dəfə 5 il öncə, Elxan Abdullayevin vaxtında ardıcıl 3 məğlubiyyət almışdı. Deməli, problem çox ciddidi və təcili olaraq həlli tapılmalıdı. “Neftçi”nin ötən tur 2 top fərqiylə önə keçdikdən, bu dəfə isə hesabı açdıqdan sonra məğlub olduğunu nəzərə alsaq, vəziyyət daha vahiməli görünür.
Samir Abasovun kreslosu laxlamağa başlayıb. Yuxarıdakı statistika uzun fasilədən sonra komandanı çempion etmiş məşqçinin dividendlərinin üstündən xətt çəkir. Zirvədə qalmaq ora qalxmaqdan daha çətindi və görünən odur ki, Abasov bunu bacarmır. Artıq “Qarabağ” 9 xal önə keçib, üstəlik daha 2 rəqib “Neftçi”yə yuxarıdan aşağı baxır. Çempionluq bir yana, hətta medalçılar sırasına düşmək üçün də mübarizə aparmaq lazım gələcək. İndiki əhval-ruhiyyə, klubdaxili gərginliklə vəzifə daha da çətinləşir.
11-ci turu özəl edən bir məqam var. Bu həftə SOCAR-dan maliyyələşən klublar digər mənbələrdən “qidalanan”larla üz-üzə gəlir. Və bitən 3 matçda müstəqil olanlar qələbəni bayram edib. Bu gün “Qəbələ” də “ənənə”yə sadiq qalsa, kimlərinsə düşünməsinə ehtiyac yaranacaq. Düzdü, “Qarabağ” istisna olmaqla, 7 klubun hamısı AFFA/SOCAR-dan hansısa formada yardım alır, hətta “Qəbələ”nin büdcəsinin böyük əksəriyyəti assosiasiyadan gəlir, amma bölgə təmsilçisi “Sumqayıt”la müqayisədə idarəçilik baxımından daha müstəqildi. Elmar Baxşıyevin yetirmələri qalib gəlməsə belə turun bitimində ilk “üçlüy”ü məhz müstəqillər təşkil edəcək.
FƏRİD