Ölkə futbolu
ASCO “peşəkarlığı”: Hacıyevlə yeni müqavilə 10 gündən sonra pozuldu
Cəmi 10 gün çəkdi. Baş məşqçisi Aftandil Hacıyevlə yeni birillik müqavilə bağlayan “Səbail” rəhbərliyi fikrini dəyişdi. Mayın 13-də anlaşmanın müddətini uzatmağa razılaşan sponsorlar 23-də ayrlıq qərarına gəldilər.
Qərar hələ rəsmən açıqlanmayıb, lakin Hacıyevin Bayıl təmsilçisində qalmayacağı dəqiqdi. Məşqçi vədinin üstündə durmayan sponsorların qeyri-ciddiliyindən bezib və yekunda belə addım atılıb. Transfer siyasətində fikirləri üst-üstə düşməyən, üstəlik, vəd edilən büdcəni yarıbayarı azaldan klub rəhbərliyi Aftandil bəyin gedişi ilə barışmalıdı.
2018-ci ildən “Səbail”i çalışdıran Hacıyev paytaxt təmsilçisini bürünc medalçı etməyi, Avropa Liqasına yüksəltməyi bacarmışdı. Son mövsümdə autsayder olan komandanın uğursuz nəticəsinin səbəbi isə sırf maliyyə çatışmazlığı idi. Komandanın aylıq büdcəsi cəmi 44 min manat idi ki, bu, iddialı komandaların bir oyunçusunun maaşı qədərdi.
Yeni mövsüm üçün öncə yaxşı büdcə vəd edən sponsor ASCO (“Azərbaycan Xəzər Dəniz Gəmiçiliyi” Qapalı Səhmdar Cəmiyyəti) son iki gündə fikrini dəyişib. Hacıyevsə ötən mövsümdəki kimi sürünüən kollektivdə çalışmaq istəməyib və yaxşı heyət formalaşdırılmasına imkan verilmədiyi üçün yolların ayrılması lazım bilinib.