Azərbaycan çempionatında İran klubu?

Futzal üzrə Azərbaycan çempionatının Yüksək Liqasında 6 komanda mübarizə aparır. Azərbaycan Futzal Federasiyasının (AFF) təşkil etdiyi yarşıda “Baku Fire”, “Neftçi” İK İB, “Araz-Naxçıvan”, “Alyans”, “Record club” və U-19 çıxış edir.

AFF-nin rəsmi saytında yarışın Əsanaməsi yerləşdirilib və orada Yüksək Liqanın təşkil olunmasının məqsədi barədə yazılıb: Avropa və Dünya Çempionatları matçlarında, Olimpiya oyunlarında çıxış etmək üçün Azərbaycan milli komandasına namizədlərin hazırlanması.

Əvvəla onu qeyd edək ki, Olimpiya Oyunlarının siyahısında futzal yoxdur. Yalnız gənclər arasında belə yarış keçirilir. Hətta futzal Olimpiadanın proqramına daxil edilsə belə, bizdə bu perspektiv görünmür.

İnsaf naminə, AFF futzalın inkişafı üçün müəyyən işlər görür, 26 komandanı əhatə edən 3 liqa təşkil edilib. Düzdü, Birinci və İkinci liqaların yüksək səviyyəsindən danışa bilməyəcəyik, hərəsində 10 komanda yarışsa da, orda çıxış edən müxtəlif şirkət təmsilçilərinin həvəskar məhəllə komandalarından fərqi yoxdur. Amma kütləvilik baxımından hətta bunu da məqbul saymaq olar.

Federasiyanın ən yaxşı addımı U-19 millisini yarışa buraxmaqdır. Klubların maliyyələşmə baxımından köməksiz qaldığı, iş adamlarının diqqət göstərmədiyi bir vaxtda milli komandaya kadrlar hazırlanmasında bu kollektivin rolu böyükdür. Düzdü, uşaqların peşəkarların önünə atılıb “döydürülməsi” yaxşı görünmür, U-19 ilk 4 turda ümumilikdə 5:42 hesabıyla uduzub və xalsızdı. Amma hətta bu da müəyyən futzalçıların seçilməsinə mane olmur. Ötənilki U-19-dan 7-10 nəfər digər komandalara götürülüb, indiki heyətdə də istedadlı uşaqlar var.

Təəssüf ki, xoş təəssüratlar bundan ibarətdi, çünki digər komandaların tərkibi heç də milli komandaya xidmətə, namizədlərin hazırlanmasına hesablanmayıb, hətta çox qorxulu məqamlar var.

“Araz-Naxçıvan” illərdi legionerlərin sayəsində çempion olur, bu komandaya cəlb olunan braziliyalılar 1-2 saatın içində milliləşdirilərək yığmaya cəlb olunur. Muxtar Respublika təmsilçisi milli komandaya yalnız bu cür “kömək edir”, son illər isə hətta milliləşdirmə də fayda vermir. Milli komandanın uğursuzluğu bir yana, legionerlərdən qurulan “Araz-Naxçıvan” ötən ay Çempionlar Liqasında fiasko yaşadı – 3 oyun, 3 məğlubiyyət.

Digər 4 komandada da müəyyən sayda legionerlər var. Amma başqa ölkə təmsilçiləri 1-2 nəfərdi, əsas üstünlük iranlılara verilib. AFF əcnəbilərə 7 nəfərlik limit tətbiq etməklə problemi yoluna qoya bilməyib. Sanki Azərbaycanda İran çempionatı keçirilir.

Aşağıda faktları təqdim edəcəyik, əlavə olaraq qeyd edək ki, heyətini qonşu ölkə nümayəndələri ilə dolduran klubların Azərbaycan idmanının inkişafına heç bir faydası yoxdur. Sanki kimlərsə NƏYİ İSƏ sübut etməyə çalışır.

Heyətinə 2 iranlı (Soroush Heidari Kahkesh, Sahand Rezapour) qatan “Baku Fire”də hər şey qaydasındaymış kimi görünür. “Neftçi” də yalnız Hassan Ali Jafari ilə kifayətlənib. Qalan iki klubdan isə bir az ətraflı bəhs etməliyik.

Baş məşqçi postunu Akbar Khodaei Oskoueiyə tapşıran “Alyans” Mousa Riyahialamdari, Armin Farrokhigharahassanlou, Mahdi Faezi və Mohammad Alizadehchokanlounu əsas heyətdə oynadır. Yerli futbolçular yalnız bir neçə dəqiqə meydanda olmaq şansı qazanır. Oyunları dəfələrlə izlədiyimdən, baş məşqçinin yerli futzalçılarla davranışı bir azərbaycanlı kimi mənə xoş gəlməyib. Oyunçuları təhqir etməkdən belə çəkinməyən Akbar Khodaei Oskoueinin hansı bacarığına görə bu posta gətirildiyini anlamıram.

Ən faciəvi vəzyyət “Record club”dadır. Əsas heyəti təşkil edən iranlı futzalçıların siyahısı:

Matin Ghahremani

Firouz Fakhri Khiavi

Mojtaba Vali Manesh

Mehdi Pourfakhar

Seyedreza Hosseini Hotkani

Ezatullah Razaie

Mahyar Pourniazi

Bu azmış kimi, komanda rəsmisiləri də azərbaycanlı deyil – Aliasgar Ebrahimi, Mojtaba Ebrahimiannejad və Reza Ebrahimi. Baş məşqçi isə Ali Tajik Khavehdir.

Siz deyin: bu komandanın Azərvaycan çempionatında nə işi var? Soyadlarından da görünür ki, bu oyunçular arasında hətta cənubi azərbaycanlı axtarmağa dəyməz, hamısı ölkəmizdə düşərgə salan farslardır. Onların milli komandamızda oynamaq şansı yoxdur, Azərbaycan futzalına heç bir xeyirləri dəyməyəcəək, avrokuboka yüksəlmək perspektivləri də görünmür, bunu 2-ci turda “Araz-Naxçıvan”a 1:8 hesabıyla uduzmaqla göstəriblər.

Bu komandanın oyunlarında tribunalara yığışan iranlıların şüarları da araşdırma mövzusudur. Sanki Bakının mərkəzində İran çempionatının oyununu izləyirik. “Record club”a diqqət edilməsi, orada hansı işlərin görülməsinin araşdırılması vacibdi. AFF çempionatda iştirakçı sayını təmin etmək naminə daha ciddi məsələləri (!!!) unutmamalıdı.

Komandanın adının yazılışı da klubun özünü Azərbaycan təmsilçisi saymadığını göstərir. “Re(c)kord (c)klub” – əslində, belə olmalıdı.

Futzal Azərbaycanda ənənəsi olan idman növüdü, hətta yarandığı mərkəzlərdən biri Bakıdır. O zaman bu rəzaləti izləməyə məcburuqmu? Bu komandaların Azərbaycan idmanına bir faydası yoxdursa, yerli idmançıların yetişməsinə xidmət etmirsə, varlığı kimə lazımdır? Bəlkə AFF Azərbaycan Mini-Futbol Federasiyasından örnək götürsün?

AFF-nın çempionatı keçirmək, klub sayını düzəltmək naminə bu kimi məsələlərə göz yumduğunu düşünürük. Amma daha yaxşı çıxış yolları var. Premyer Liqa klublarını qadın komandası saxlamağa məcbur edən AFFA yaxşı olardı ki, bizə daha uyğun olan futzalla bağlı oxşar layihə düşünsün.

FƏRİD