“Az oynamağım mənim xeyrimədir” – Sebalyos “Neftçi”dən daha az səhv etdiklərini düşünür

“Sabah”ın ispaniyalı hücumçusu Kristian Sebalyosun futbolinfo.az-a müsahibəsi

• “Neftçi” ilə oyun gərgin keçdi…
• Bu cür oyunlar həmişə öz intensivliyi və gərginliyi ilə seçilir. “Neftçi” ilə qarşılşma da bu baxımdan istisna olmadı. Bu cür matçların nəticəsinin müəyyənləşməsində səhvlər əsas rol oynayır. Kim daha az səhv edirsə, o da qalib ayrılır. Bu baxımdan rəqibdən daha yaxşı oynadıq və bizim üçün vacib olan qarşılaşmadan 3 xalla ayrılmağı bacardıq.
• Komandanız yaxşı formadadır. Belə davam edə biləcəksiz?
• Gələcək barədə danışa bilmərəm. Yalnız onu deyə bilərəm ki, hazırda çox yaxşı formadayıq. Bundan sona kimi yararlanmaq lazımdır. İndi yalnız növbəti oyunlarımıza köklənmişik.
• “Qarabağ”dan sonra çempionatın ən güclü komandası sayılırsız. Bununla razılaşırsan?
• Hazırkı vəziyyət belə deməyə imkan verir. Lakin mən 12 ildir peşəkar futboldayam və hər şeyin bir anın içində dəyişə biləcəyini yaxşı anlayıram. Məhz buna görə, bu cür detallar barədə düşünmək əvəzinə, bütün fikrimi növbəti oyunlarımıza cəmləmişəm.
• Son oyunlarda az meydana çıxırsan….
• Zədədən yeni qayıtdığımı nəzərə alsaq, son oyunlarda bir neçə dəqiqə meydanda olmağımın mənim xeyrimə olduğunu deyə bilərik. Hər oyun bir az daha çox şans qazanıram ki, bu da öz formamı bərpa etmək baxımından çox yaxşıdır. Məşqçi məni start “11-liy”ində meydana buraxacağı ana kimi tam hazır olmaq istəyirəm.
• Baş məşqçiniz hakimlikdən narazılıq etdi. Sənin düşüncələrin necədir?
• Düzü, hakimlik barədə danışmağı xoşlamıram.
• Qarşıda “Qəbələ” ilə oyun var. Qələbə qazanmağa davam edəcəksiz?
• Rəqibin kim olmasından asılı olmayaraq, mən hər matçdan qələbə ilə ayrılmaq barədə düşünürəm. Təbii ki, bütün rəqiblərə hörmətlə yanaşıram. Lakin dediyim kimi, hər oyunuma qalib gəlmək istəyi və inamı ilə çıxıram.

FƏRİD