Ölkə futbolu
Bakıya “ağ-qara” yürüşü
Konfrans Liqasının III təsnifat mərhələsinə vəsiqə qazanan “Sabah”la “Neftçi” “ağ-qara” rənglərə malik klublarla qarşılaşacaq. Hər iki klub bizə yaxşı tanışdır desək, yeni bir söz kəşf etmərik. “Partizan” müxtəlif illərdə klublarımızla münasibətlərinə aydınlıq gətiribsə, “Beşiktaş”ı isə belə desək, öz komandalarımız qədər yaxından tanıyırıq. Amma istənilən halda, qısa da olsa, hərəsi haqda müəyyən təsəvvür yaratmağa çalışacağıq.
Əvvəlcə, klublarımızla “Partizan” arasında görüşlərin qısa tarixçəsinə nəzər salaq. “Qəbirqazanlar”la ilk yolumuz 2008/09 mövsümündə ÇL-in təsnifat mərhələsində kəsişib. “İnter” Bakıda bu rəqibi ilə 1:1 hesablı heç-heçə oynayıb, səfərdə isə 0:2 hesabı ilə məğlub olub. 2012/13 mövsümündə “Neftçi” bu komanda ilə AL-in qrup mərhələsində qarşılaşıb – Belqradda hesab açılmayıb, Bakıda isə 1:1 hesabı qeydə alınıb. 2 il sonra yenə “Neftçi” bu komanda ilə Avropa Liqasında qarşılaşıb. Amma bu dəfə təsnifat mərhələsində… Təəssüf ki, təmsilçimiz Serbiyada 2:3, Bakıda isə 1:2 hesabı ilə məğlub olub.
Bəli, 10 ildən sonra Bakıya yenə də “partizanlar” gəlir. Şəxsi oyunlarda heç vaxt üstələyə bilmədiyimiz komandanın öhdəsindən “Sabah” gələ biləcəkmi? İlk oyun Masazırda keçiriləcəyindən, rəqibin qonaq olarkən çıxışlarına nəzər salmaq yerinə düşərdi.
Əslində, “Partizan” da eynilə HJK kimi son vaxtlar avrokuboklarda səfər matçlarında yaxşı təsir bağışlamır. Belqradlılar son 12 oyunda cəmi 3 qələbə qazanıblar, 4 heç-heçə ediblər və 5 dəfə uduzublar. Ancaq bir fərqlə ki, bu 12 görüşün 11-də rəqib qapısına yol tapıblar. “Qara-ağlar” ümumilikdə bu matçlarda 16 qol vurub. Təbii ki, burada “qəbirqazanlar”ın qarşılaşdığı rəqiblərin səviyyəsi də nəzərə alınmalıdır. “Partizan” “Nitsa”, “Feyenoord”, “Gent”, “Soçi” kimi komandaları üstələyə bilməyib.
“Partizan”ın daxili arenada da işləri qaydasında getmir desək, yanılmarıq. “Ağ-qaralar” son illərdə Serbiyada ikinci plana keçiblər. Belə ki, son 6 mövsümün çempionu onların əzəli rəqibi “Srvena Zvezda” olub. “Partizan” bu müddətdə yalnız iki dəfə ölkə kubokuna sahib çıxıb. “Qəbirqazanlar” 2018-2021-ci illər aralığında “Srvena Zvezda”ya “bata bilməyiblər” və yekunda 14-18 xal geri qalıblar. 2018/19 mövsümündə, ümumiyyətlə, “Partizan” üçün faciə yaşanıb: “qırmızı-ağlar”la 30 xallıq bir fərq! Nəhayət, 2020/21 “futbol ili” “Sabah”ın rəqibinin azarkeşlərinə ümid bəxş edib. Belə ki, “Partizan” həmin mövsüm “Srvena Zvezda” ilə başa-baş rəqabət aparıb və sonda yalnız 2 xal geri qalıb. Ancaq hər şey fiasko ilə nəticələnib. Maliyyə problemləri ilə üzləşən komanda son mövsümdə çempionatda 4-cü yeri tutub və “Srvena Zvezda”nı özündən 26 xal irəli buraxıb!
Artıq qeyd etdiyimiz kimi, maliyyə vəziyyəti stabil olmayan “Partizan” bu yay heyətlə bağlı ciddi itkilərlə üzləşib. Belə ki, komandanın ötən mövsümkü ən yaxşı bombardiri Rikardo Qomeş Qətərin “Əl-Şamal” klubuna keçib. Belqradlılar onun satışından 1,5 milyon avro qazanıblar. Eyni zamanda, “Partizan”ın ən yaxşı müdafiəçisi olan Slobodan Uroşeviç Kipr “Aris”inə yollanıb. Serbiya təmsilçisi vacib futbolçusuna görə cəmi 200 min avro əldə edib. Həmçinin, arxa xəttin digər dayağı sayılan stopper İqor Vuyaçiç 1 milyon avroya “Rubin”ə keçib. Əsas qapıçı Aleksandar Popoviç isə 210 min avroya Slovakiyanın “Dunayska Streda” klubuna satılıb.
Bu üç futbolçunun yaşının 30-dan aşağı və “Transfermarkt” saytına görə ümumi dəyərinin 10 milyon avrodan çox olduğunu nəzərə alsaq, “Partizan”ın uğursuz siyasət yürütdüyünü deyə bilərik. Hə, təbii ki, “Qarabağ”a qayıdan Patrik Andradeni də unuda bilmərik.
Əvəzində “qara-ağlar” 4 futbolçunun heyətinə cəlb olunmasına 2 milyon avro xərcləyiblər. Özü də bu məbləğin böyük hissəsini, daha dəqiq desək, 1,3 milyon avronu yaxşı tanıdığımız futbolçu – icarə əsasında “Neftçi”də çıxış edən hücumçu Mateus Saldanyaya sərf ediblər. “Partizan” məbləğin qalan 700 min avrosunu isə serbiyalı üç oyunçuya xərcləyib. Limassol “Aris”indən qapıçı Aleksandar Yovanoviç (450 min avro), “Ximki”dən sol cinah müdafiəçisi Nikola Antiç (150 min) və “Baçka Topola”dan Arancel Stojkovic (150 min) heyətə cəlb edilib. Daha 5 futbolçu – hücumçular Nemanya Nikoliç və Aldo Kalulu, sol vinger Ksander Severeina, yarımmüdafiəçi Aleksandar Şçekiç və müdafiəçi İqor Tsetoyeviçi azad agent kimi heyətə qatıblar.
“Partizan”ın oyun üslubuna gəlincə, komandada legioner sayı çox olsa da, baş məşqçi İqor Dulyay start heyətində yerli oyunçulara daha çox bel bağlayır. Dulyaydan söz düşmüşkən, 2000-07-ci illərdə Serbiya millisinin yarımmüdafiəçisi olan 43 yaşlı mütəxəssisi yəqin ki, “Şaxtyor”dakı çıxışından yaxşı tanıyırsınız. Dayaq yarımmüdafiəçisi olduğundan Dulyay məşqçi kimi də komandasının əsasən daha yaxşı müdafiə olunmasına diqqət ayırır. Desək ki, bu, onların ifasında tam yaxşı alınır, bir qədər yanlış olardı. Amma meydanın mərkəzində sabiq “Rubin”li Bibars Natxo və seneqallı Frank Kanute ilə Kristian Beliç sayəsində rəqbi mühasirəyə də ala bilirlər.
Hücumda Kuinsi Meniqlə Nemanya Nikoliçdən xüsusi ehtiyatlanmaq lazımdır. Niderlandlı Meniq sol cinahdan cərimə meydançasına ildırım kimi şığaya bilir. Niderland çempionatında bişən daha bir cinah hücumçusu kurasaolu Xander Severina da sağ cinahda təhlükə mənbəyiridr. Təbii ki, “Neftçi”dən qaçan Mateus Saldanyanı da unuda bilmərik. Braziliyalı artıq Serbiya çempionatının ilk turunda ötən mövsümün gümüş mükafatçısı “Baçka Topola” ilə səfər görüşündə fərqlənə bilib.
“Neftçi”nin rəqibi olan “Beşiktaş”dan isə çox danışmağa ehtiyac yoxdur. Ən azı bu komandanı mayın 13-də Bakıda “Sabah”la oyunda gördük və yetərincə də dəyərləndirdik. Elə “Neftçi” də iyulun 15-də Sankt-Peterburqda “Fənərbağça” ilə görüşdə də İstanbul nəhənginə qarşı necə oynaya biləcəyini göstərdi. Təbii ki, “Beşiktaş”ın rəqibi nə “Sabah”dır, nə də “Neftçi” “Fənər”lə qarşılaşacaq. Ən əsası, komandamız artıq rəsmi oyunda gücünü sınamalı olacaq.
Bəs görəsən, “Sabah”la oyundan sonra “Beşiktaş”da nə dəyişib? Əsas buna diqqət ayırsaq, yetərlidir.
“Beşiktaş” ötən mövsümlə müqayisədə bu yay transferlərə təxminən 4 dəfə az pul xərcləyib. Konkret desək, İstanbul klubu 2022/23 mövsümündə futbolçuların cəlb olunmasına 25 milyon 550 min avro ödəmişdisə, indi bu rəqəm qat-qat aşağı – cəmi 6 milyon 250 mindir. Maraqlıdır ki, oyunçuların satışı ilə bağlı eyni tendensiyanı görmək mümkündür. Belə ki, “qara qartal” ötən mövsümdən fərqli, bu yay 4 dəfə az qazanıb. Amma alış ilə müqayisədə buradakı rəqəmlər daha azdır. “Beşiktaş” futbolçuların satışından 2022/23 mövsümündə 10,5 milyon avro, bu yay isə cəmi 2,5 milyon qazanıb.
İndi isə keçək Şenol Günəşin komandasının yeni transferlərinə. Siyahıya baxanda “qara qartal”ın iki əzəli rəqibi – “Qalatasaray” və “Fənərbağça”dan xeyli geri qaldığını görmək mümkündür. Xüsusən də Okan Burukun komandasından. “Beşiktaş” bu yay 1-i yerli, 4-ü isə əcnəbi olmaqla 5 oyunçunu heyətinə qatıb. 6 milyon 250 min avronun 60 faizindən çoxu (4,04 milyon) “Lans”dan dayaq yarımmüdafiəçisi Jan Onananı almaq üçün xərclənib. 2 milyon avro ötən mövsümü İstanbul klubunda keçirən sol cinah müdafiəçisi Artur Masuakunu “Vest Hem”dən birdəfəlik transfer edilməsi üçün xərclənib. Yerdə qalan pul isə “Somaspor”dan sol vinger Emrecan Bulut üçün verilib. Eyni zamanda, “Beşiktaş” azad agent statusunda “Milan”dan vinger Ante Rebiçi, “Lester”dən isə mərkəz müdafiəçisi Daniel Amartini heyətinə qatıb.
Bəs, Bakıda “Beşiktaş”ın qarşısını necə almaq olar? Rəqibin heyətində Vinsen Abubakar və Cekson Muleka kimi yüksək səviyyəli hücumçuların varlığını nəzərə alsaq, “Neftçi”nini işinin necə çətin olacağını təsəvvür etmək olar. Etiraf edək ki, Mutunun komandasının ən zəif nöqtələri müdafiənin cinahlarıdır. Ömər Buludovla Azər Salahlı ilə bu iş alınmayacaq. Xüsusən də Ömərin Mulekanı necə saxlayacağı maraq doğurur. Hələ sağ cinahdan Onur Bulutun həmlələrindən də ehtiyatlanmaq lazımdır. Belə məqamda, “Neftçi”nin dayaq yarımmüdafiəçilərinin öhdəsinə ağır yük düşəcək. Eddi İsraflovla Emin Mahmudov, həmçinin Ataa Caberlə Kenni Sayef hücum qədər müdafiəni də düşünməlidir.
“Beşiktaş”ın cinahlarını bağlaya bilsək, bəlkə nəyəsə ümid etmək olar. Çünki Şenol Güneşin komandası “Tirana”nı məhz cinahların fəallığı sayəsində yıxdı. Bir də mümkün qədər Jedson Fernandeslə Salih Uçanın mərkəzdəki pressinqinin öhdəsindən gəlmək lazımdır. Onlarla Abubakar arasında “marşrut yolu”nu bağlaya bilsək, bəlkə nəyəsə ümid etmək olar.
“Beşiktaş”ın hava toplarından da ehtiyatlanmaq lazımdır. Bu mənada Yuri Matiasla Mark Tamaşın üzərinə böyük yük düşəcək. Rəqibi ani şəkildə gözdən qoymaq və ya hava toplarında uduzmaq bütün planların üstündən xətt çəkəcək. “Sabah”la müqayisədə “Neftçi”nin işi daha çətin olacaq. Bizə isə yaxşı nəticəyə ancaq ümid etmək qalır…
ABBAS
- Milli komanda2024-05-03 08:00
Vay(ss) bizim halımıza?
- Müsahibə2024-05-02 15:51
Dodo “Qəbələ”yə kömək etmək istəyir: I Liqada da oynamağa hazırdır
- Ölkə futbolu2024-05-03 15:05
“Neftçi”nin transfer etmək istədiyi futbolçu Danimarkada həbsdə olub – cinsi təcavüzə görə
- Digər idman növləri2024-05-03 13:25
Tanınmış idmançılarla – öncə master-klas, sonra birgə məşq