Ölkə futbolu
Bölgə futbolu: nazir də vədinə əməl etmədi
Xaçmazlı həmkarımız Elxan Yusifli doğma rayonunda futbolun durumundan yazıb. O, dünən Xaçmazdakı arenadan bəhs edib, vertolyot meydançasına çevrilən qurğudan foto paylaşıb, şəhərdəki digər stadionların aqibətini xatırladıb.
“İki yüz min əhali yaşayan Xaçmaz rayonunda cəmi bir stadion var. Xaçmaz Olimpiya İdman Kompleksinin həmin meydançası da ölçülərinə görə standarta uyğun deyil. Ot örtüyü də yox kimidir. Yenə sağ olsunlar ki, uşaqların pulsuz məşq keçməsinə şərait yaradırlar. Paltardəyişmə otaqlarından istifadəyə də icazə verilir.
Gənclər və İdman naziri Fərid Qayıbov yeni təyin olunanda rayondakı idman qurğuları ilə tanış olan zaman kompleksdə oldu. Nazirə məlumat verildi ki, bu, Xaçmazda yeganə stadiondur. Təklif olundu ki, ot örtüyü süni örtüklə əvəz edilsin, stadionun ölçüləri də standartda uyğunlaşdırılsın. Təklif müsbət qarşılandı. Bildirildi ki, stadiona mutəxəssislər gəlib baxacaqlar. Amma həmin vaxtdan xeyli keçsə də, gələn olmadı. Sonra Xaçmazın futbol ictimaiyyətinin bir qrup üzvü nazirliyə məktub yazdı. Həmin məktub da yerli Gənclər və İdman İdarəsinə yönləndirildi. Məsələ bununla bağlandı.
Stadion başqa məqsədlər üçün istifadə ediləndə uşaqların məşq keçməyə yeri yoxdur. Bu yaxınlarda idmandan qabiliyyət imtahanı keçirilirdi deyə stadion iki gün uşaqların üzünə bağlandı. Bu günlərdə Xaçmaz və Şabranda yanğınları söndürməyə gələn helikopterlər də yanacaq doldurmaq üçün kompleksin meydançasına endirdilər. Bu səbəbdən də normal məşq keçmək mümkün olmadı. Rayon çempionatının final oyunu keçiriləcək deyə, bir neçə gün uşaqların məşqləri təxirə salınmalı oldu.
Sadaladıqlarım da vacib məsələlərdir. Ona görə də mütləq alternativ variantlar olmalıdır.
Xaçmazın rayon mərkəzində əvvəllər iki böyük stadion olub. Birinin yerində məktəb tikilib, qalan ərazi isə həyətyanı torpaq sahəsi kimi əhaliyə paylanılıb. İkinci stadionun yerində isə polis şöbəsi üçün inzibati bina tikilib. Orda da qalan ərazi həyətyanı torpaq sahəsi kimi sakinlərə paylanıb”.
İnanın ki, bütün bölgələrimizdə oxşar durumdu, Xaçmaz sadəcə, bir nümunədi. Biz isə milli komandada niyə xorvatların, braziliyalıların, dağıstanlıların, anqolalıların oynamasından danışırıq. Halbuki hər rayondan bircə normal futbolçu çıxsa, milli komandamızda inanılmaz rəqabət olar, faydasız əcnəbilərə möhtac qalmarıq.