Bu oyuna daha yaxşı qələbə hesabı yaraşardı

Bərbad Azərbaycan futbolundan, rəqabətsiz Premyer Liqadan “Qarabağ” kimi qitə səviyyəli komanda çıxıbsa, buna görə klubu daha çox alqışlamaq lazımdı. Komanda bizi daha yaxşı nəticəyə, tələbkarlığa, ondan ummağa o qədər öyrəşdirib ki, İsveçrə çempionu üzərində parlaq oyunla qazanılan minimal hesablı qələbəni bəyənmir, 2-3 top fərqini gözləyirik.

Şanslar bərabərdi, Bakıda 3:2 hesabıyla qələbə qazansaq da, İsveçrədə hər şey daha çətin olacaq. Qonaqların oyundan qopmaması, fərq böyüdükdən sonra belə inadkarcasına döyüşməsi səviyyə göstəricisidi. “Sürix” təslim olmağı xoşlamır, əksinə, son ana kimi şanslarını əldən verməməyə çalışacaqlar.

“Qarabağ” erkən qol vurmaqla öz işini rahatlatdı. Ardınca növbəti qol gəldi, futbolçular yaxşı oyunun bəhrəsini gördülər. Fasiləyə kimi meydanda oyuna diqtə edən ağdamlılar bunu tabloda da əks etdirincə Çempionlar Liqasının qrupu yolunda ümidlərimiz artdı.

Lakin fasilədən sonra rəqib həm bəzi oyunçuları, həm də taktikanı dəyişdi. Diaqonal ötürmələrlə daha geniş oynayan rəqib “Qarabağ”ın müdafiəsini cinahlara “dartmaqla” mərkəzdən daha rahat keçməyə çalışdı. Düzdü, qolları bu üsulla vurmadılar, lakin xeyli təhlükə yaratdılar. Buraxılan qollarda təqsirləndirilən Şahruddin Məhəmmədəliyev məhz həmin epizodlarda bir neçə dəfə əla oynamağı bacardı.

Təəssüf ki, “Qarabağ”da oyuna sonradan daxil olan futbolçular komandanın balanslı oyununu pozdu. Bu, baş məşqçi Qurban Qurbanovun səhvi deyildi. Sadəcə, ağdamlıların bu cür matçlar üçün yüksək səviyyəli oyunçuları kifayət qədər deyil. Belədə yorulan futbolçuları əvəz edənlər ümumi ansamblı korladı, “Lex”ə qarşı oyunla müqayisədə zəif təsir bağışladılar. Ramil Şeydayev pis matç keçirmədi, lakin onun ardıcıl səhvləriylə yadda qalan epizodun yekununda etdiyi qayda pozuntusu hesab arasındakı fərqin azalmasıyla nəticələndi.

“Qarabağ” bu şoku tez atlatdı və İbrahima Vadji dubl etməklə üstünlüyü bizə qaytardı. Təəssüf ki, son dəqiqələrdə yenə bir epizodda səhvlər zəncirləndi. Yarımmüdafiədə itirilən topu Şahruddin uğursuz dəf etdi, müdafiəçilər düzgün reaksiya vermədi və “Qarabağ”ın qapısına təyin olunan penaltiylə fərq yenidən bir topa endi.

3:2 üstünlüyü təsdiq edən hesabdı, lakin inadkar “Sürix”lə cavab matçı daha çətin keçəcək. Ağdamlılar yenə hücum futbolu sərgiləməyə, isveçrəlilərin öz futbolunu diqtə etməyə əngəl olmağa məcburdu. Qurbanov bunun fərqindədi və mətbuat konfransında dedikləriylə “Qarabağ”ın səfərdə də öz üslubuna sadiq qalacağının işarəsini verdi. “Sürix” keçilməz rəqib deyil, lakin yuxarıdan aşağı baxacağımız komanda da sayılmır. Maksimum konsentrasiya, hücum futboluna sadiqlik sayəsində ümumi uğur qazanmaq mümkündü. Fərdi səhvlər minimuma endiriməli, irəlidə daha məhsuldar oynamaq gərəkdi.

Qurbanov komandanı daha üst səviyyəyə qaldıra bilib. “Qarabağ” topu daha çox özündə saxlayır, qol vurmağı düşünərkən daha sürətli və daha sərt ötürmələrə üstünlük verir. Son 2 oyunda 8 qol vurmaq təsadüf deyil. İrəlidə aqressiv oyunun nəticəsi olan məhsuldarlığa davam etmək, zəif olduğumuz rəqib standart vəziyyətlərinə əngəl olmaq lazımdı. Komanda oyunu müdafiədən qursa, bunun fəsadları olacaq. İsveçrəlilər “ikinci mərtəbə”də təhlükəlidi, onların pressinqini üzərinə almaq məğlubiyyətə razılaşmaq deməkdi.

“Qarabağ”a inanmaq, dəstəkləmək lazımdı. Təbii ki, işlər yolunda getməyə, səfərdə arzuolunmaz nəticə də qeydə alına bilər. Lakin bütün bunlar “Qarabağ”ın gözəl oyununu kölgəyə ata bilməz. Hədəfi, məqsədi bəlli olan, ən əsası, yaxşı oynayan komanda üçün uğurlu nəticə əvvəl-axır gələcək. “Lex”lə oyunda olduğu kimi…

FƏRİD