Müsahibə
“Bütün ev oyunlarımızı Xankəndidə keçirməyimizi istərdim”
MOİK-in hücumçusu Sabir Allahquliyevin futbolinfo.az saytına müsahibəsi
– Birinci Liqada mövsümün ilk yarısını komandanız üçün necə dəyərləndirirsiniz?
– Müsbət dəyərləndirirəm. Çempionatın ilk dövrəsi bizim üçün pis keçmədi. İlk “3-lük”də olmaq üçün mübarizə aparırıq. Hələlik istədiyimizə nail oluruq.
– Bir müddət turnir cədvəlinə başçılıq etsəniz də, qış fasiləsinə 3-cü pillədə yollandınız. İlk sıradakı mövqeyinizi qoruya bilməməyinizin səbəbini nədə görürsünüz?
– Çempionat turdan-tura daha da çətinləşir. Çünki hamı digər komandaların hansı taktiki sxemdə oynadığını öyrənir. Bundan əlavə, bəzi futbolçularımız zədələndilər, komandaya kömək edə bilmədilər. Bu səbəblərdən liderliyi qoruya bilmədik.
– 2023-cü ildə sizin üçün ən yaddaqalan oyun yəqin ki, Xankəndidə “Qarabağ”la keçirilən kubok matçı oldu…
– Bəli, düz qeyd etdiniz. Ən yaddaqalan matç Xankəndidəki görüş oldu. Bu oyun heç vaxt yaddan çıxmaz. Xankəndidə ilk qolu vura, tarix yaza bilərdim, amma qismət olmadı. Stadionda çox gözəl atmosfer var idi. Hər şey əla təşkil olunmuşdu. İstərdim ki, bütün ev oyunlarımızı Xankəndidə keçirək.
– Premyer Liqa klubları ilə müqayisədə Birinci Liqada qış fasiləsi bir qədər uzun çəkəcək. Bunun sizə nə kimi xeyri və ya ziyanı ola bilər?
– Məncə, fasilənin bu qədər olması yaxşıdır. Futbolçulara da istirahət etmək lazımdır. Düşünürəm ki, çempionatdakı fasilə bizə mənfi təsir etməyəcək, əksinə, xeyri olacaq.
– Qış fasiləsindən sonra ilk oyununuzu “Karvan”a qarşı keçirəcəksiniz. Bu görüşdən 3 xalla ayrılmaq mümkün olacaq?
– “Karvan” yaxşı komandadır. Kimin qalib gələcəyini zaman göstərəcək. Matça ciddi hazırlaşmalıyıq ki, yaxşı oyun göstərək və meydandan qələbə ilə ayrılaq. İnşallah, 3 xal qazanan tərəf biz olarıq.
– Mövsümün ikinci yarısında hansı komandaları MOİK-in əsas rəqibləri qismində görürsünüz?
– Əvvəlki illərlə müqayisədə bu il çox komanda çempionluğa oynayır. Deməzdim ki, liqada zəif komanda var. “Şamaxı”, “Qaradağ Lökbatan”, “Karvan” və “İmişli”ni özümüzə əsas rəqiblər hesab edirik.
– Bu il 36 yaşınızı tamamlayacaqsınız. Gələcəklə bağlı planlarınız nədir? Karyeranızı MOİK-də davam etdirmək, başqa kluba keçmək və ya mövsümün sonunda futbolla vidalaşmaq fikrindəsiniz?
– Karyeramı hələ davam etdirmək fikrindəyəm. Məncə, futbolu buraxmaq hələ mənim üçün tezdir. Nə vaxt karyeramı bitirsəm, futbol həyatıma məşqçi kimi davam edəcəyəm.
ABBAS