Müsahibə
Çempionatın yerli bombardiri: “Hədəflərim var”
“Araz-Naxçıvan”ın hücumçusu Orxan Əliyevin futbolinfo.az saytına müsahibəsi
– “Araz-Naxçıvan”ın mövsümün ilk yarısındakı performansına necə qiymət verərdiniz?
– Ümumi götürsək, özümüzü yaxşı tərəfdən göstərə bildik. Debütant komandanın nəsə edəcəyinə heç kim inanmırdı. Buna baxmayaraq, mövsümün ilk yarısını uğurlu keçirməyi bacardıq.
– Siz özünüz qış fasiləsinə ikinci pillədəki komandadan cəmi 3 xal geridə yollanacağınızı gözləyirdiniz?
– Bir daha təkrar edirəm ki, bunu heç kim bizdən gözləmirdi. Yəqin düşünürdülər ki, Premyer Liqaya yeni gəliblər, autsayderlər zonasında yer alacaqlar. Buna rəğmən yaxşı, mübariz oyunla xallar qazandıq. Hazırda turnir cədvəlinin 6-cı pilləsindəyik. Məncə, bundan da yaxşı nəticə göstərə bilərdik. Bir qələbə bizi ikinci yerə qədər yüksəldə bilər. Bu üzdən də mübarizəni davam etdirəcəyik.
– Vurduğunuz 5 qolla çempionatın ən məhsuldar yerli futbolçususunuz. Öz performansınız tam ürəyinizcədir?
– Fikrimcə, daha çox qol vura bilərdim. Çünki hər oyunda qol vəziyyətləri yaradırdım. Məncə, özümü yaxşı tərəfdən göstərə bildim. 5 qol vursam da, ikinci yarıda bunun davamını gətirəcəyimə inanıram. Bunun üçün öz üzərimdə işləyirəm. Qarşıma qoyduğum hədəflər var, ona çatmağa çalışacağam.
– Əvvəllər əsasən vinger kimi çıxış edirdiniz. “Araz-Naxçıvan”da isə hücumun sivri ucunda yer alırsınız. Bu mövqeyə uyğunlaşmaq çətin olmadı?
– Düzdür, çox vaxt vinger və ya ikinci hücumçu kimi çıxış edirdim. Bu mövsüm daha çox mərkəz hücumçusu kimi oynayıram. Əslində, bu, yaxşı haldır. Çünki futbolçu universal olmalıdır. Məşqçi hansı mövqeyə qoysa, orada özünü doğrultmalısan. Məndə də bu, pis alınmır. Bir yox, bir neçə mövqedə oynamağı bacarmağım sevindirici haldır.
– Çempionatda hansı müdafiəçilərə qarşı oynamaq daha çətindir?
– Konkret kimisə fərqləndirmək istəmirəm. Hər oyun çətin keçirdi. Rahat olan matç olmadı. Çox şey mənim özümdən asılı idi. Özümü necə göstərməyim vacib idi. Qarşımda kimin olduğuna baxmıram. Meydana nəyə görə çıxdığımı, qol vurmalı olduğumu bilirəm.
– Cari mövsüm Premyer Liqadakı mübarizəni necə dəyərləndirərdiniz?
– Fikrimcə, çox maraqlı çempionat gedir. Hətta bunun ən maraqlı mövsüm olduğunu deyənlər var. Onların fikri ilə razıyam. Turnir cədvəlinə fikir verin, ikinci yerlə altıncı pillədəki komanda arasında cəmi 3 xal fərq var. İkinci yarının başlamasını səbirsizliklə gözləyirəm.
– Mübarizəni sona qədər davam etdirib, avrokuboklara iddia etmək şansınızı necə görürsünüz?
– İnanıram ki, özümüzü yaxşı tərəfdən göstərə biləcəyik. Bu mübarizəni davam etdirmək və mövsümün sonunda daha yaxşı mövqedə qərarlaşmaq istəyirik. Bunun üçün üzərimizdə daim çalışırıq.
AĞA