Ölkə futbolu
Corceviçlə razılıq əldə olundu, növbədə…
Heyətini komplektləşdirməyə çalışan “Zirə” əsas diqqətini müdafiənin mərkəzini gücləndirməyə yönəldib. “Qartallar” iki stopper axtarır və onlardan biri ilə artıq anlaşıb.
Serbiya “Radniçki”sinin oyunçusu Lazar Corceviçi artıq “Zirə”nin yeni üzvü saya bilərik. Qəsəbə təmsilçisi 28 yaşlı serblə razılığa gəlib, tezliklə rəsmi müqavilə bağlanacaq. 28 yaşlı müdafiəçi ilə ikiillik anlaşma nəzərdə tutulub.
2019-cu ildən “Radniçki”də oynayan futbolçu burada 20 matça 3 qol vurub. 7 klub dəyişməyə imkan tapan Lazar Şimali Makedoniya, Slovakiya və Çexiyada legioner həyatı yaşayıb.
“Zirə” digər mərkəz müdafiəçisini də ölkə xaricində axtarır. Anastasios Papazoğlu, Yovan Krneta, Miloş Bakraç, Adrian Skarlatake, Bəxtiyar Həsənalızadə kimi mərkəz müdafiəçilərinin yerini daha səviyyəli biri doldurmalıdı. Baş məşqçi Rəşad Sadıqov hazırda namizədləri nəzərdən keçirir.
Yarımmüdafiəyə də əcnəbi axtaran “qartallar”ın əsas problemi qapı ilə bağlıdı. Səviyyəli əlcək ustasıına ehtiyac duyan qəsəbə təmsilçisi tezliklə bu problemi də yoluna qoymalıdı. “Keşlə”dən Rəşad Əzizli transfer edilsə də, qapıdan arxayın olmaq üçün daha bir nəfərə ehtiyac var.