I Liqa
Daha bir oyunda hakim şousu: 6 qırmızı vərəqə!
Başımız Premyer Liqanın 24-cü turu çərçivəsində keçirilən “Sabah” – “Neftçi” oyununa qarışıb, daha böyük həngaməni qaçırmışıq. Aprelin 25-də baş tutan və 2:2 hesabıyla bitən görüşdə baş hakim Vüqar Həsənli meydan sahiblərindən 4 nəfərə qırmızı vərəqə göstərmişdi. Sən demə, ondan da cəsarətlilər var imiş.
Futbolinfo.az xəbər verir ki, I divizionun 23-cü turu çərçivəsində reallaşan MOİK – “Qarabağ-2” matçında meydan sahibləri daha böyük qəzəbə düşar olub. Aprelin 24-də Binədə baş tutan oyunda baş hakim Nicat İsmayıllı 6 nəfərə qırmızı vərəqə göstərib. Qonaqların 2:0 hesabıyla qalib gəldiyi görüşdə “hərbçilər”in 4 futbolçusu və 1 rəsmi şəxs, qonaqlardan da 1 futbolçu hakimin sərt üzünü görüb.
Matçda nələrin baş verdiyindən xəbərsizik. Yəqin ki, AFFA bu gün qərarları açıqlayarkən səbəbləri də elan edəcək. Amma hadisələrin matçın son bölümünə təsadüf etməsi ciddi qalmaqalın reallaşdığından xəbər verir. 70-89-cu dəqiqələr arasında vərəqələrin havada uçuşması, səbəb kimi “qeyri-idman hərəkəti”, “təcavüzkar hərəkət”, “hakimin qərarından narazılıq” göstərilməsi ciddi dava-dalaşın baş verməsinin xəbərçisidi.
O da var ki, qırmızı vərəqələrin böyük əksəriyyətinin bir komandaya göstərilməsi onların narazılığının göstəricisidi. Yəqin ki, hakimin hansısa səhv və ya qərəzli qərarı bu cür fəsadlara səbəb olub. Gözümüz önündə şou göstərən Vüqar Həsənlidən fərqli olaraq, Nicat İsmayıllının əməllərindən xəbərsizik, bu səbəbdən onu günahkar elan etməyə tələsmirik. Amma AFFA-nın olayı araşdırması və ədalətli qərar verməsi gərəkdi. Belə olacağına ümid edirik.
FƏRİD