Müsahibə
“Daha üst pillələrdə qərarlaşa bilərdik” – Fərid Nəbiyev
“Turan Tovuz” klubunun yarımmüdafiəçisi Fərid Nəbiyevin futbolinfo.az saytına müsahibəsi
- Bəzi klublarımız təlim-məşq toplanışı üçün Antalyaya getdikləri halda, bəziləri qış fasiləsini Azərbaycanda keçirməyi üstün tutdular. Türkiyədə toplanış keçməyiniz mövsümün ikinci hissəsinə daha hazır olmağınıza şərait yaradacaq?
- Fikrimcə, bu toplanış xeyrimizə olacaq. Həm yaxşı komandalara qarşı yoxlama matçı keçirəcəyik, həm də intensiv məşqlərlə çempionatın ikinci hissəsinə tam hazır olmağa çalışacağıq. Bu mənada, Antalya toplanışının bizə fayda verəcəyini düşünürəm.
- Çempionatın ilk yarısındakı çıxışınızı necə dəyərləndirirsiniz? Qış fasiləsinə 7-ci pillədə yollanmaq qaneedicidir?
- Daha üst pillələrdə qərarlaşa bilərdik. Əsas odur ki, yenə də yuxarı pillələrdən qopmamışıq. Sonadək mübarizəmizi davam etdirəcəyik.
- Mövsümün ilk yarısını daha yuxarı pillələrdə bitirməyinizə nə mane oldu?
- Bəzi oyunlarda cüzi səhvlər buraxdıq və həmin səhvlər bizi çətin duruma saldı. O səhvləri buraxmasaydıq, nəzərdə tutduğum xal itkilərinə yol verməsəydik, daha yuxarı pillələrdə ola bilərdik.
- Öz performansınız haqda hansı fikirdəsiniz? Qışaqədərki oyununuzdan tam razı qaldınız?
- İlk dəfə bu sistemdə oynayıram. Çalışıram ki, komandaya, sistemə tam uyğunlaşım. Əlbəttə, bundan daha yaxşı ola bilərdi. Bəzən bir az vaxta ehtiyac olur. Müəyyən zaman keçdikdən sonra daha yaxşı adaptasiya olursan.
- Qış fasiləsindən sonra ilk oyununuzu “Kəpəz”ə qarşı keçirəcəksiniz. Bu komandaya ilk 2 dövrədə qalib gəlmisiniz. Qərb derbisindən yenə qələbə ilə ayrıla biləcəksiniz?
- Fikrimcə, “Kəpəz” indi daha yaxşı çıxış edir. Onlara qarşı budəfəki oyun çox çətin keçəcək. Buna baxmayaraq, meydana qələbə üçün çıxacağıq. Qalibiyyət bizi yuxarı pillələrdən qopmağa qoymayacaq. Qərb derbisində yenə 3 xal əldə etməklə azarkeşlərimizi sevindirmək istəyirik.
- Çempionatın ilk yarısında sizin üçün ən yaddaqalan oyun hansı oldu?
- “Zirə” ilə evdə keçirdiyimiz görüşü fərqləndirərdim. Həmin matçda vacib qələbə qazandıq.
- Mövsümün ikinci yarısında hədəfiniz nə olacaq? “Turan Tovuz”un gücü çempionatı hansı pillədə bitirməyə yetəcək?
- Çalışacağıq ki, çempionatı maksimum yuxarı pillələrdə bitirək. Buna da gücümüz var. Hər oyunda xal və ya xallar qazanmaq üçün sona qədər döyüşəcəyik.
- Mətbuatda adınız tez-tez başqa klublarla birgə çəkilir. Gələcək planlarınız nədən ibarətdir? Mövsümün sonunda Azərbaycanda daha iddialı kluba keçmək, yoxsa yenidən legioner həyatı yaşamaq istərdiniz?
- Bu haqda mövsüm bitəndən sonra qərar verəcəyəm. Hələlik bu barədə fikirləşmirəm.
- FƏRİD