“Delimitasiya və demarkasiya matçı”nı “Zirə” qazandı

“Zirə” yenə qol buraxdı, amma bu, komandanın növbəti qələbəsinə əngəl olmadı. Mövsümün ən çox məyus olan ikinci komandası, “Sumqayıt”la görüş istisna olmaqla, hər qarşılaşmada məyus olub. Ötən tur “Qarabağ” hesabda geri düşdüyü matçda “qartalar”ı qol vurmağına peşman etmişdisə, dünən qəsəbə təmsilçisi “Turan Tovuz”a eyni aibəti yaşatdı.

Bir az da bəxt sayəsində hesabı açan meydan sahibləri, eyni üsulla da top buraxdı. Ardınca Hamidu Keyta səviyyəsini ortaya qoyub tovuzluların hələ yüksək yerlər uğrunda mübarizəyə hazır olmadığını göstərdi. “Zirə” daha sanballı heyəti sayəsində haqlı qələbə qazandı.

“Turan Tovuz” – “Zirə” oyunu “delimitasiya və demarkasiya matçı” idi. Eyni xala malik rəqiblər kimin yüksək, kimin aşağı pillələr üçün mübarizə aparacağını müəyyənləşdirməli, xəyali sərhədi çəkməliydi. Turnir cədvəlinin tən ortasında qərarlaşan komandalar xal bölsəydi, vəziyyəti aydınlaşdırmaq üçün növbəti turları gözləmək lazım gələcəkdi. Lakin qonaqlar buna imkan vermədi və rəqibin avrokuboklara düşmək uğrunda mübarizə arzularını təxirə saldı. Təqvimi nəzərə alsaq, qarşıdakı turlarda fərq bir az da artacaq.

“Turan Tovuz”un növbəti 4 matçı çox çətin keçəcək. “Qarabağ”la iki, “Neftçi”ylə bir matçın arasında özünə gəlmək istəyən “Səbail”lə görüş var. Ola bilər ki, bu matçlar tovuzluları bir qədər geri salsın, ən azı autsayderlərin yaxınlaşmasına şərait yaransın. Düzdü, Ayxan Abbasovun yetirmələri 7 matça 10 xal toplamaqla minimum vəzifənin öhdəsindən gəlib, amma ardıcıl 2 məğlubiyyət böyük seriyaya dönsə, narahatlıq başlayacaq.

Artıq rəqiblər də tovuzluları ciddiyə almağa başlayıb, komandanın bəlli heyəti və oyun üslubu var. Mövsümün gedişində bu komandanın qələbələri əvvəlki qədər rahat olmayacaq. Necə ki, dünən “Zirə” matça ciddi yanaşdı və qələbəni təmin etdi. Xüsusilə 1:7-dən sonra toparlanmaq qeyd edilməlidi. Komandanın oyun dəst-xətti oturuşunca, yeni futbolçular heyətə tam uyğunlaşınca “Zirə” yenə üst pillərdə görünəcək. “Qartallar”ın izlədiyi komandalar çox uzaqda deyil.

Nəticələrdə sabitliyə nail ola bilməyən “Zirə” növbəti turda “Şamaxı”ya qalib gəlməyi bacarsa, vəziyyətini xeyli yaxşılaşdıracaq. İlk baxışdan rəqib münasibdi, amma qəsəbə təmsilçisinin ev matçlarında zəif oynaması diqqət çəkir. Qazanılan 4 qələbədən yalnız biri evdə əldə edildiyindən, büdrəmə təhlükəsi hər zaman aktualdı. Qış fasiləsinə ilk “dördlük”də getmək “Zirə”nin başlıca hədəfidi. Rəşad Sadıqovun yetirmələri bunu bacarsa, komanda üzərindəki təzyiqi atacaq.

Zatən indiki durumda avrokuboklara mümkün 4 vəsiqəyə 5 iddiaçı var. “Səbail”də ciddi dəyişiklik olmasa, indidən kimlərin bunun üçün yarışacağı bəllidi. “Turan Tovuz” isə autsayderlər qrupunun lideri kimi qalmaqdadı. Qarşıdakı 4 matçdan heç olmasa, 4 xal əldə etmək mümkün olsa, qışda heyəti daha da gücləndirməklə mövsümü rahat başa vurmaq olar. Məğlubiyyətlər sıralansa, psizoloji təzyiq komandanı daha da tormozlaya bilər. Amma Abbasovun təcrübəsi bu problemlərin öhdəsindən gəlməyə kifayət etməlidi. Üstəlik, Tovuza səfər əksər komandalar üçün oyuna 0:1 geridə başlamaq deməkdi.

AĞA