Elçin Məmmədov qovuldu, Babək Quliyev vəzifəyə gəldi

Premyer Liqa oyunlarının bərbad idarəçiliyi, hakimlərin bacarıqsızlığı hamını boğaza yığıb. Vəziyyət o qədər pisdi ki, ölkə kuboku uğrunda son matçların birində ciddi qalmaqal yaşandı.

Belə ki, “Səbail”in məşqçisi Vüqar Məmməd komandasının yarımfinala yolunu açıq-aşkar bağlayan hakimlər briqadasına etirazını bildirərkən, əsəbini cilovlamağı bacarmadı. Onun köməkçilərdən birini itələməsi 20 oyunluq cəzalanmasına, klubun isə 16 min manat cərimələnməsinə səbəb oldu.

Əslində, bu qəzəb AFFA rəhbərliyinə, Hakimlər Komitəsinə idi. Komandaların haqqı yeyilir, məşqçi və futbolçuların əziyyəti yerə vurulur. Sivil qaydada şikayət edib, problemin həllinə nail olmaq mümkün deyil. Ona görə də futbolçular, məşqçilər bıçağın sümüyə dayandığını görür, əsəblərini cilovlamağı bacarmır və yolverilməz üsullara əl atırlar.

AFFA qəribə sistem yaradıb. Əksər klublar SOCAR-dan maliyyələşdiyi üçün onların rəsmi şikayət etmək imkanı yoxdu. Klublara AFFA tərəfindən təyin edilən bu şəxslər etirazını bildirmir və elə görünür ki, sanki hansısa problem yoxdu. Məşqçilər, futbolçular hakimlikdən danışan kimi cəzalanır, fit sahibləriniin ümumiyyətlə, açıqlama verməsi qadağan edilib. Hakimlər Komitəsinin sədri Frits Stuxlik də epizodları şərh etmir, səhvlərdən danışmağı lazımsız bilir.

Problemlərə toxunulmadıqca ictimai rəy dondurulur, sünilik yaranır. Belədə gündən-günə artan problemlər dözülməz olur və Vüqar Məmməd kimi hansısa məşqçi cinayətə bərabər tutulacaq hərəkətə əl atır, kiməsə fiziki təzyiq edir. Bu gedişat daha pis nümunələrə yol açacaq.

Amma AFFA hakimlikdəki problemlərin biabırçı həddə çatmasının fərqindədi. Az qala hər tur hansısa oyunun nəticəsini birbaşa hakimlər müəyyənləşdirir, xırda səhvlərin isə sayı-hesabı yoxdu. Buna görə qurum daxilində bəzi tədbirlər görülüb.

Bu gün AFFA-da hakimlər üçün iclas keçirilib və bəzi qərarlar açıqlanıb. Məlum olub ki, komitə üzvü Elçin Məmmədov vəzifəsindən uzaqlaşdırılıb. Xeyli bacarıqsız yetirməsi olan, bir çox gənclərə “day-daylıq” edən bu şəxs təyinatlara da “barmaq edirmiş”. Komitə daxilində ab-havanı pozan, hakimlər arasında ikitirəlik yaradan səlahiyyət sahibinin əməlləri ifşa olunub.

Məmmədov bundan sonra yalnız Futzal Federasiyasındakı işinə davam edəcək. Futzal hakimləri ilə işləyəcək Elçin bəyi AFFA-nın binasına buraxmayacaqlar. O, çalışdığı federasiyanın oyunlarındakı təyinatlara cavabdeh olacaq, divizion və Premyer Liqa matçlarına əli çatmayacaq.

Elçin Məmmədov sədr Frits Stuxlikin köməkçisi kimi Hakimlər Komitəsinin üzvü olmaqla yanaşı, futzalda da çalışırdı. Bu federasiyanın prezidenti Zaur Axundova xidməti davam etdirəcək sabiq referinin məhz rəhbərinə yardıma görə “vurulduğu” deyilir. Axundovun eyni zamanda rəhbəri olduğu Premyer Liqa təmsilçisi “Keşlə” nin oyunlarına təyinatlar zamanı xəlvət işlər görən Məmmədovun günahı sübut olunub. Bugünədək Bakı klubu hansısa hakim səhvindən əziyyət çəkməyib, əksinə, son olaraq, “Kəpəz”ə qarşı kubok matçında referi qərəzinə sevinib. Gəncəlilərin qapısına olmayan penaltinin təyin edilməsi “Kəpəz”in yekunda məğlubiyyəti ilə nəticələnmişdi.

Bu kimi faktlar çoxaldığından, nəhayət, Məmmədovu yola salmaq lazım bilinib. Və onun əvəzinə yeni üzv də təyin edilib. İclaslarda dəfələrlə Elçin bəylə əlbəyaxa olmuş sabiq FIFA referisi Babək Quliyev bundan sonra komitədə çalışacaq.

Müəyyən tədbirlər görülməsi yaxşıdı, amma fərdlərin əvəzlənməsi heç nəyi dəyişmir. Komitə sədri Stuxlik özü bacarıqsızdı və məhz onun səriştəsizliyi üzündən hakimlər xaosa sürüklənib.

FƏRİD